- БНХАУ-ын нийслэл Бээжин хотоос iKon.mn сайтын сэтгүүлч А.Ням-Өлзий мэдээлж байна -
Монгол Улсын Ерөнхийлөгч Х.Баттулгын БНХАУ-д хийж буй Төрийн айлчлалын хүрээнд хувийн хэвшлийн зарим компани тус улсын хувийн хэвшлийнхэнтэй хамтран ажиллах гэрээнд гарын үсэг зурсан билээ. Тэдний төлөөлөл болгон зарим компанийн байгуулсан гэрээний талаар танилцуулж байна.
“Бодь интернэшл” ХХК-ын Гүйцэтгэх захирал А.Амундра “Энэ удаагийн Ерөнхийлөгчийн айлчлалын хүрээнд манай “Бодь интернэшл” компанийн Бөөрөлжүүтийн талд хэрэгжүүлэх гэж байгаа Бөөрөлжүүтийн 300 мВт-ын цахилгаан станцын хөрөнгө оруулалт болон гүйцэтгэгчийн гэрээг дахин баталгаажууллаа. Бөөрөлжүүтийн цахилгаан станцын тухайд хэд хэдэн онцлог бий. Нэгдүгээрт, энэ бол цэвэр арилжааны төсөл. Хувийн хэвшил цэвэр арилжааны захаас зээл босгоод барих гэж байгаа төсөл юм.
Хоёрдугаарт, Монголын өсөн нэмэгдэж байгаа эрчим хүчний хэрэглээг хангахад нэлээд өндөр үүрэг гүйцэтгэнэ. Гуравдугаарт, эрчим хүчний системд нийцтэй байдлаараа 300 мВт-ын станц бол техникийн зохимжтой шийдэл бүхий төсөл юм.
Бөөрөлжүүтийн цахилгаан станц нь Төв аймгийн Баянжаргалан сумын нутаг, Бөөрөлжүүтийн талд баригдана.
Төслийн явцын тухайд ТЭЗҮ батлагдсан, ажлын зургийн шатанд явж байгаа. Энэ төслийн бас нэг онцлог нь дагалдах бүтээн байгуулалт нэлээд ихтэй. Тухайлбал, авто зам, эрчим хүчний шугам барих юм. Нийт хөрөнгө оруулалт ойролцоогоор 600 орчим сая ам.доллар. Цахилгаан станцын төсөвт өртөг ойролцоогоор 420 сая ам.доллар байгаа.
Эхний ээлжинд төвийн бүсийн эрчим хүчний дутагдлыг хангах зорилт тавьж байгаа. Цаашдаа говийн бүсэд байгаа уул уурхайн төслүүдийг эрчим хүчээр хангах боломжтой. Ерөнхийдөө ашиглалтад орох хугацааг 2.5 жил гэж тооцож байгаа” гэлээ.
“Эрдэнэс стийл” компанийн Гүйцэтгэх захирал н.Батболд “Манай компани нь төрийн өмчит “Эрдэнэс Монгол” болон “Бэрэн” группийн 50, 50 хувийн төр, хувийн хэвшлийн хамтарсан компани юм.
Манай компани Сайншанд, Чойрын бүсэд баригдах кокс, ган төмөрлөгийн цогцолбор үйлдвэрийг Хятадын төрийн өмчит "Синостийл" компанитай түлхүүр хүлээлгэн өгөх нөхцөлөөр барьж байгуулах хамтын ажиллагаагаа баталгаажуулж гарын үсэг зурлаа.
Тус үйлдвэрийн ТЭЗҮ нь батлагдсан, олон улсад нэр хүндтэй ICBC банк санхүүжүүлэхээр төлөвлөгдсөн, бодитой шатанд орсон төсөл байгаа юм.
Энэ үйлдвэр нь ашиглалтад орсноор эхний ээлжинд хагас сая тонн металлургийн кокс, 300 мянган тонн ган төмөрлөг бүтээгдэхүүн, үүн дотроо арматур, лист төмөр, ган утас зэрэг бүтээгдэхүүн үйлдвэрлэнэ.
Цаашдаа 10 сая тонн хүртэл ширмэн болон бусад бэлдэц төмрүүдийг үйлдвэрлэж, экспортлох хүчин чадалтай.
” гэв.
Америк доллар
