Голаны өндөрлөгийн шинэ сууринг Израйль улс Дональд Трампын нэрээр нэрлэнэ

Голаны өндөрлөгийг Израйлийн газар нутаг болохыг АНУ хүлээн зөвшөөрсний хариуд энд байгуулагдах шинэ сууринг Дональд Трампын нэрээр нэрлэх хүсэлтэйгээ ерөнхий сайд Бенжамин Нетаньяху мэдэгджээ.

Тэрээр өчигдөр тус бүс нутагт зочлохдоо энэ тухай ярьсан байна.

Өнгөрсөн гуравдугаар сард АНУ-ын ерөнхийлөгч Дональд Трамп албан ёсоор Голаны өндөрлөгийг Израйлийн газар нутаг хэмээн хүлээн зөвшөөрсөн юм.

Уг газар нутгийг 1967 оны дайны үеэр Израйль улс Сириэс булаан эзэлсэн байдаг. Дараа нь 1981 онд Израйлийн эрх баригчид хууль баталснаар өөрийн газар нутагт тооцох болжээ.

 Гэхдээ дэлхийн улс орнууд Голаны өндөрлөгийг Израйлийн газар нутаг гэдгийг хүлээн зөвшөөрдөггүй. Дональд Трампын шийдвэр нь хэдэн арван жил мөрдөгдсөн АНУ-ын гадаад бодлогыг эргүүлсэн явдал байлаа.

“Ерөнхийлөгч Трампын түүхэн шийдвэрийг бүх израйльчууд сэтгэл хөдлөн хүлээж авсан. Тиймээс бид холбоотондоо талархал илэрхийлэх ёстой” гэж Нетаньяху өчигдөр сэтгүүлчдэд ярьсан байна.

Тэрээр нэр оноох шийдвэрийг удахгүй засгийн газартаа танилцуулахаа амлажээ. Одоо Голаны өндөрлөгт 20,000 орчим Израйлийн иргэн суурьшаад байгаа.

2017 онд Израйлийн нийслэлээр Иерусалем хотыг хүлээн зөвшөөрсөн шийдвэрийг Трамп гаргасан нь мөн л АНУ-ын уламжлалт гадаад бодлогыг өөрчилсөн хэрэг байлаа.

Энэ гавьяаг нь үнэлж Иерусалемын баруун хананы ойролцоо байдаг төмөр замын өртөөг Дональд Трампын нэрэмжит болгох тухай Израйлийн албаныхан өмнө нь ярьж байжээ.

Эх сурвалж: Independent