MAC үйлдлийн системийн орчинд монгол бичгээр бичих боломж нээгдлээ

Гэрэл зургийг: MPA.mn

Өмнө нь цахим орчинд монгол бичгээр бичихэд кодчиллын стандарт, фонтын ялгаатай байдал байсан хэдий ч “Болорсофт” ХХК болон хэсэг бүлэг эрдэмтэн, хөгжүүлэгчдийн зүгээс энэ тал дээр анхаарч, сүүлийн гурван жилийн хугацаанд хөгжүүлэлт хийсний үр дүнд цахим орчинд “Юникод” стандартын дагуу монгол бичгийн гар болон таван төрлийн фонтыг гаргаж, танилцуулсан талаар бид мэдээлсэн билээ.

Монгол бичгийн фонт хөгжүүлэгчдийн зүгээс энэ сарын 13-ны өдөр зөвхөн Windows үйлдлийн системийн орчинд монгол бичгээр бичих боломжийг хэрэглэгчдэд хүргээд байсан юм.

Тэгвэл өнөөдөр буюу “Олон улсын эх хэлний өдөр”-ийг тохиолдуулан монгол бичгээр MAC үйлдлийн системд монгол бичгээр бичих шинэ боломж болон монгол хэл бичгийн багш Т.Дашцэдэн агсны гар бичмэлээс бүтээсэн гар бичмэл фонтыг хэрэглэгчдэд дэлгээд байна.

 

Гэрэл зургийг: MPA.mn

“Болорсофт” ХХК-ийн Гүйцэтгэх захирал Ч.Мөнхнаран "MAC үйлдлийн систем дээр монгол бичгээр бичих боломжийг нээж өгснөөр монгол бичгийн хувьд нэгдсэн нэг загварчлалтайгаар аль ч үйлдлийн систем дээр бичигдсэн текстийг хооронд нь хөрвүүлж, унших боломжтой болж байна гэсэн үг.

Өмнө монгол бичгийг цахим орчинд ашиглаж чадахгүй байсан гол шалтгаан нь олон төрлийн кодчиллоор бүтсэн программчлал, фонт, гар зэргээс хамааран хийгдсэн текст болон контентууд амархан "эвдэрдэг" хүндрэлтэй байсан бол одоо энэ бүх асуудлыг шийдвэрлэж, цэгцэлсэн гэдгийг дуулгахад таатай байна” хэмээлээ.

Ингэж MAC үйлдлийн системд буй фонт Windows орчинд орохоор зөрж, текстийг хооронд нь хөрвүүлэхэд алдаа их гарч, эвдэрдэг байжээ. Харин энэхүү шинээр танилцуулж буй тунгаамал загварын /Refined model/ гар болон фонтыг ашигласнаар ямар ч төрлийн компьютер дээр эвдрэлгүй гарах боломжтой болсон нь онцлогтой аж.

 

Гэрэл зургийг: MPA.mn

Дээрх шинэ хувилбараас гадна манай улсад ашиглагдаж буй монгол хэл, бичгийн сурах бичгүүдэд өргөнөөр ашиглагддаг монгол хэл, бичгийн Т.Дашцэдэн багшийн гар бичмэл фонтыг мөн шинээр танилцуулсан юм. Гар бичмэл фонт нь дармал фонттой харьцуулахад нүдэнд таатай, уншиж, бичиж, харахад илүү амар байдаг тул энэхүү гар бичмэл загварыг ашиглан калиграфын мастер Т.Жамьянсүрэн цахим фонт болон гарын суулгацад зориулан боловсруулж, бүтээжээ.

Ийнхүү монгол бичгийн хувьд компьютер дээр бичих боломжийг бүрэн бүрдүүлээд буй тус багийнхан тун удахгүй гар утсанд зориулсан IOS болон Android үйлдлийн систем дахь хувилбарыг нэвтрүүлэхээр ажиллаж буй талаараа мөн дуулгасан юм.