Галт зэвсгийн тооллого болон шинээр мөрдөгдөх замын хөдөлгөөний дүрэмтэй холбоотой цаг үеийн асуудлаар цагдаагийн байгууллагаас хэвлэлийн бага хурал хийж байна.

ШУУД ҮЗЭХ:

Лицензийн төвийн дэд дарга, цагдаагийн дэд хурандаа П.Эрдэнэбат "Монгол Улсын галт зэвсгийн тухай хуульд заасны дагуу иргэн, хуулийн этгээдийн өмчлөлд байгаа галт зэвсэг, галт зэвсэгтэй адилтгах хэрэгслийн тооллого энэ сарын 12-нд эхэлсэн. Арга хэмжээ арванхоёрдугаар сарын 12-н хүртэл явагдана. 

Хоёр сарын хугацаатай үргэлжлэх нэгдсэн арга хэмжээний хүрээнд Галт зэвсгийн тухай хууль, холбогдох журмын хэрэгжилтийг хангах, галт зэвсгээр үйлдэгдсэн гэмт хэргийг илрүүлэх, галт зэвсэг, галт зэвсэгтэй адилтгах хэрэгсэл, сумны хууль бус наймааг таслан зогсоох, эрэн сурвалжлагдаж байгаа гал зэвсэг, түүнтэй адилтгах хэрэгслийг илрүүлэх, бүртгэх, гэрчилгээжүүлэх ажлыг зохион байгуулж байна.

Гэрэл зургийг mpa.mn

Мөн цагдаагийн байгууллагын зүгээс улсын хэмжээнд галт зэвсгийн тооллогыг зохион байгуулж байгаатай холбогдуулан цагдаагийн байгууллага иргэдэд ямар нэгэн чирэгдэлгүйгээр ажиллахаар зорьж байна. 

Галт зэвсгийг хуулиар хүлээсэн үүргийн дагуу бүртгүүлж оролцохыг иргэдээс хүсэж байна" гэлээ.

Иргэд болон хуулийн этгээд галт зэвсэг болон түүнтэй адилтгах хэрэгслийг бүртгүүлэхдээ:

• Галт зэвсгийн гэрчилгээ
• Иргэний үнэмлэх эсвэл хуулийн этгээдийн улсын бүртгэлийн гэрчилгээ,
• Галт зэвсгийг аюулгүй байдлыг хангах биет байдлаар авч ирэн нийслэлийн иргэд бол Нийслэлийн цагдаагийн газар орон нутагт оршин суугаа нутаг дэвсгэрийн цагдаагийн байгууллагын эрх бүхий албан тушаалтанд бүртгүүлэх юм байна.

Галт зэвсэг эзэмшигч зайлшгүй сургалтад суусан байх ёстой. Сургалт долоо хоног бүр болдог бөгөөд хоёр хоногийн хугацаанд болдог байна. Бүртгэл арванхоёрдугаар сарын 12-ныг дуустал үргэлжилнэ гэв.

Иргэд, жолооч нар шинэ дүрмийн талаар legalinfo.mn сайтаас орж уншиж, танилцахыг иргэддээ зөвлөж байна

 

Тээврийн цагдаагийн албаны УСХ-ийн дарга, цагдаагийн хурандаа Э.Бөхбат "2018 оны арваннэгдүгээр сарын 1-нээс замын хөдөлгөөний дүрмийн шинэчилсэн найруулгыг мөрдөж эхэлнэ.

Иргэд, жолооч нар шинэ дүрмийн талаар legalinfo.mn сайтаас орж уншиж, танилцахыг иргэддээ зөвлөж байна. Хэрэв шинэ заалтуудтай холбоотой бүр ойлгомжгүй зүйл байвал энэ талаар тээврийн цагдаагийн албанд ирж мэдээлэл авах боломжтой.

Шинэчилсэн найруулгын 60 төрлийн зүйл заалтыг зайлшгүй судлах шаардлагатай. Жишээ нь, цас орсон тохиолдолд заавал өвлийн дугуйг сольж тавьсан байх ёстой зэрэг зайлшгүй мөрдөх зүйлс бий.

​Шар тэмдэглэгээтэй уулзварууд дээр зөрчил илрүүлэгч камер нэмэгдэж тавигдана. Хэрэв цагдаагийн байгууллагад боломж байвал бид явган хүний гарц болгон дээр бусад улс орон шиг жижиг оврын камер тавьж суурилуулахаар санал хүргүүлсэн байгаа. Хэрэв ингэвэл гарц дээр зам тавьж өгдөггүй сахилгагүй жолооч нарын асуудал шийдэгдэж, жолооч нар хариуцлагажих боломж байна.

Дүрэм гэдэг нь эцсийн бүлэгт, иргэд зорчигчдын аюулгүй байдлын төлөө гардаг гэдгийг ойлгох хэрэгтэй" гэв.