ХУУЧИРСАН МЭДЭЭ: 2018/05/22-НД НИЙТЛЭГДСЭН
МЭЗЧ2018: Монгол Улсын Хөгжлийн загвар хэлэлцүүлгийн ОНЦЛОХ ЭШЛЭЛҮҮД
iKon.MN
Гэрэл зургийг mpa.mn
Төрийн ордонд Монголын Эдийн Засгийн Чуулган 2018 үргэлжилж байна. Өнөөдөр Их танхимд болсон Монгол Улсын хөгжлийн загвар нэгдсэн хэлэлцүүлгийн ОНЦЛОХ ЭШЛЭЛүүдийг хүргэж байна.
Монгол Улсын Ерөнхий сайд асан Р.Амаржаргал:
- Хөгжлийн загварын талаар ярихад олон чиглэл рүү ороод байна. Гэхдээ илтгэгч нарын ярьснаас үзэхэд одоо байгаа баримт бичгээ бид хөгжлийн загвар гэж ойлгох нь зөв бололтой.
- Гурван тулгуурт бодлого дээр тулгуурласан үйл ажиллагаа нь манай хөгжлийн өнөөгийн шатанд загвар болж явах ёстой. Үүнийгээ хэрэгжүүлэх асуудал дээр онцгой анхаарах шаардлагатай юм байна.
- Сүүлийн 27 жилийн хугацаанд урт хугацааны 3 үндсэн баримт бичиг боловсруулж, баталсан. Тэрийг дагаад салбар хоорондын 500 гаруй бодлогын баримт бичиг болосвруулсан. Өнөөдөр хүчин төгөлдөр байгаа баримт бичиг нь 160 байна.
www.mpa.mn
УИХ-ын гишүүн Л.Энх-Амгалан:
- Бид өөрсдийн хүссэн хэмжээгээр хөгжиж чадсан уу гэвэл үгүй. Үүнд улстөрчид буруутай.
- Гурван сая хүн амын 60 хувь нь буруу замаар будаа тээж байна.
- Нэг Засгийн газрын амьдрах хугацаа 1.8 жил гэхээр. Яаж бид хөгжих вэ.
- Хөгжлийн загвар, хөгжлийн индекс тогтвортой байх ёстой.
- Улстөрийн тогтвортой байдал бий болвол бодлогын тогтвортой байдал бий болно.
- Эрх мэдлийн зөв хуваарилалтыг хийж өгөх шаардлагатай.
- Тогтвортой хөгжлийн институт хэрэгтэй байна. Үндэсний хөгжлийн газраа чадавхжуулж бэхжүүлэх шаардлагатай.
www.mpa.mn
ШУА-ийн дэд ерөнхийлөгч Т.Дорж:
- Тогтворгүй байдал нь бидний хөгжлийг урагшлуулахгүй, саад болсон.
- Шинжлэх ухааны байгууллагуудыг юунд ч оролцуулахгүй байна. Энэ их хүчийг яаж ашиглах вэ гэдгийг бодох ёстой. Хөгжлийн асуудалд ШУ-ны байгууллагуудын оролцоо чухал.
- Нүүдлийн соёл иргэншлийн шилдэг өв уламжлалыг орчин үеийн шинжлэх ухаантай хослуулах ёстой. Ингэж байж хөгжинө.
- Эдийн засгийн чанарын өсөлтийг хангах зохистой бүтэц бүхий эдийн засаг байх ёстой.
- Бид олон төрлийн цаас бэлтгэж, шийдвэрүүд гаргаж байна. Олон цаас бэлтгэхээс илүүтэй үйл ажиллагаа болгох нь чухал.
www.mpa.mn
Санхүү эдийн засгийн судалгааны төвийн тэргүүн Л.Энхтайван:
- Анх мөрийн хөтөлбөр хийхдээ шинжлэх ухааны үндэслэлтэй хийж байх хэрэгтэй.
- Үндэсний хөгжлийн хүрээлэнг байгуулах нь маш чухал алхам.
- Хоёроос доошгүй институт байгуулах нь зөв юм.
- Үндэсний хөгжлийн газарт яг үнэндээ стратеги, бодлого төлөвлөгөө дээр ажилладаг 20, 30 хүн л байдаг. Яаж энэ хэдхэн хүн Монгол Улсын бүх салбарын хөгжлийн асуудлыг шийдэх вэ.
www.mpa.mn
УИХ-ын гишүүн Д.Тэрбишдагва:
- Монгол Улсад тогтвортой юм алга. Эмзэг биш сэдэв ч алга. Хууль гаргадаг, хуулиа хэрэгжүүлдэггүй улс болчихсон.
- 187 мянган төрийн албан хаагч нар байна. Энэ бол хэтэрсэн тоо. Төрийн албан хаагч нарыг бүгдийг нь шалгалтад оруулах ёстой.
- Сум орон нутагт бодлого алга. Яаж хөгжих юм бэ.
- Боловсролын системд өөрчлөлт оруулах хэрэгтэй.
- Шинжлэх ухааны үндэслэлтэй бодлого явуулж чадахгүй байна.
- Эдийн засгийн асуудал бол Монголын улстөрийн асуудал болчихоод байна.
www.mpa.mn
Эдийн засагч, УИХ-ын гишүүн асан С.Дэмбэрэл:
- Угаах зүйлсийн жагсаалт хэтэрхий олон болчихсон. Хамгийн их бохирдсоноо гаргаж ирж угаах хэрэгтэй. Нэгдүгээрт, хуулийн засаглал. Хоёрдугаарт, төрийн алба. Гуравдугаарт, уул уурхайн засаглал. Энэ 3 зүйл хиртсэн байна.
- Засаглал, институцийн чанарын талаар ярилцах хэрэгтэй.
- Одоо үлдэж буй цагтаа хуулийн засаглалыг сэргээх талаар УИХ санаачилж хэлэлцээсэй.
- Төрийн зохицуулалтын шимтгэлийг хийхгүй бол хүнд суртал ургаад байна. Хортой мөөг шиг эргээд ургасан байна.
- Бид өнөөдөр Монгол Улсад дундаж анги хэд байгааг мэдэхгүй байна. Тэгсэн мөртлөө 2030 онд чинээлэг дундаж ангийг бий болгоё гэсэн байна. Тиймээс дундаж ангийг эхлээд тодорхойлъё.
- Үндэсний хөгжлийн газар байх шаардлагагүй. Оронд нь Үндэсний хөгжлийн яам байгуулах хэрэгтэй. Үндэсний хөгжлийн газар чинь хоёрын хооронд байгууллага. Байгаа үгүй нь мэдэгдэхгүй.
Эдийн засагч Н. Дашзэвэг заалнаас гар өргөн үг хэлэхдээ:
- АНУ-ын төв банкны захирлаар хэзээ ч улс төрч томилдоггүй.
- Монголбанк, үндэсний хөгжлийн газрын захирлууд улс төрийн намаас хараат бус байх ёстой.
- Үндэсний хөгжлийн газрын даргад уралдаан, тендэр зарла.
- Манай улсад сүүлийн 4 жилд бүтээмж огт нэмэгдсэнгүй.
- Дундаж цалин 1,000 доллар байхаар хөгжлийн загвараа хий.
www.mpa.mn
Эдийн засагч, нийтлэлч Д.Жаргалсайхан заалнаас гар өргөн үг хэлэхдээ:
- Бид маш олон зүйл ярьснаа асуудлын гаргалгааг гаргахгүй тарах гэж байна. Та нар авлигаа ярихгүй байна.
- УИХ-ын гишүүд мафийн гишүүн болчихоод яагаад бид нарыг ингэж, тэгж амьдар гэж заагаад байгаа юм. Ингэж ярих эрх та нарт байгаа юу?
- Монгол Улсын намуудын санхүүжилтийг та нар чимээгүй хараад хүртээд амьдраад байгаа чинь Монгол Улсыг авлигад автуулж гүйцлээ.
- Өнөөдрийн бүх асуудлын суурь нь хаанаас ирсэн нь мэдэгдэхгүй мөнгөний асуудал юм.
Анхааруулга
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
