Уншиж байна ...
Зураг
Зураг
ХУУЧИРСАН МЭДЭЭ: 2018/03/06-НД НИЙТЛЭГДСЭН

Р.Р.Ракшаев: Монгол Улсад суугаа Орос иргэд энэ сарын 18-нд саналаа өгнө

А.Үлэмж, iKon.mn
2018 оны 3 сарын 6
iKon.MN
Зураг зураг
Гэрэл зургийг mpa.mn

ОХУ-ын Ерөнхийлөгчийн ээлжит сонгууль энэ сарын 18-нд болох гэж байна. Үүнтэй холбогдуулан өнөөдөр ОХУ-аас Монгол Улсад суугаа Элчин сайдын яамнаас мэдээлэл хийлээ.

ОХУ-аас Монгол Улсад суугаа Элчин сайдын яамны зөвлөх сайд Р.Р.Ракшаев "Орос улсад төрийн тэргүүнээ 6 жил тутамд сонгодог.  Энэ удаагийн сонгууль уламжлал ёсоор амралтын өдөр буюу гуравдугаар сарын 18-ны Ням гарагт болно. 

Монгол дахь санал хураах байрууд ч мөн энэ өдөр 08:00-20:00 цаг хүртэл нээлттэй байна. Одоогоор Монгол Улсад түр хугацаагаар эсвэл байнгын оршин суугаа нийт 1,300 гаруй сонгогч байна. Тэд Монгол Улсын 3 санал хураах байранд очиж сонгуульд оролцох юм.

Тодруулбал, Улаанбаатар хотод оршин суугаа сонгогчид Орос-Монголын хамтарсан 14-р сургуулийн байран дээр очиж саналаа өгнө. Дархан (Залуучуудын гудамж), Эрдэнэт (5-р хороолол) хотын консулын газарт мөн сонгуулийн байрууд ажиллах болно.

Сонгогч нь ОХУ-ын насанд хүрсэн иргэн байх бөгөөд гадаад, дотоод паспорт нь хүчинтэй байх ёстой. 

ОХУ-ын СЕХ-ны даргын өгсөн мэдээллээр сонгогчдын тоо 2018 оны нэгдүгээр сарын байдлаар  108 саяд хүрсэн байна. Харин ОХУ-ын Гадаад хэргийн яамны консулын газрын мэдээлснээр гадаадад оршин суугаа нийт 1,875,408 сонгогч байгаа юм.

Нэр дэвшигчдийн тухайд гэвэл 8 хүн Ерөнхийлөгчийн сонгуульд өрсөлдөж байна. Нэг нь бие даан нэр дэвшигч бол, үлдсэн нь улстөрийн намуудаас сонгогдсон нэр дэвшигчид юм" гэлээ.

Энэ удаагийн сонгуульд ОХУ-ын ерөнхийлөгч Владимир Путин бие даан, улиран нэр дэвшсэнээр ялалт байгуулах магадлал өндөртэй нэр дэвшигчээр тодроод буй. 

Харин үлдсэн долоон нэр дэвшигчдийн рейтинг бүгд нийлээд ч Владимир Путиныг гүйцэхгүй байгаа юм.

ОХУ-аас Монгол Улсад суугаа Элчин сайдын яамнаас өгсөн мэдээллээр судалгаагаар:

  • Владимир Путин 69.5%, 
  • Коммунист намын Павел Грудинин 7.8%, 
  • Либерал ардчилсан намын Владимир Жириновский 5.9%, 
  • Иргэний санаачилга намын Ксения Собчак 1.6%, 
  • Яблоко (алим) намын Григорий Явлинский 0.9%, 
  • Бүх ардын нэгдэл намын Сергей Бабурин 0.3% 
  • Өсөлт намын Борис Титов 0.3%, 
  • Оросын Коммунистууд намын Максим Сурайкин 0.1% хувийн рейтингтэй байна. 

Түүнчлэн энэ удаагийн сонгуульд санал тоолох төхөөрөмжийг улс орон даяар ашиглан, автоматжуулахаар болжээ.