Ч.Уртнасан: Бага насны хүүхэд, оюутнууд улаанбурханаар өвдөх нь их байна

 

Шинэ төрлийн улаанбурхан өвчин гарсан эсэх талаар ХӨСҮТ-ийн Олон нийттэй харилцах албаны дарга Ч.Уртнасангаас тодрууллаа.

"Ямар нэгэн шинэ төрлийн халдварт өвчин бол гараагүй. 2015 оны гуравдугаар сараас улаанбурхан өвчин тархаж эхэлсэн.

Сүүлийн үед бага насны хүүхэд, сурагчид, оюутнууд улаанбурханаар өвдөх нь их байна. Иймээс онцгой анхаарах хэрэгтэй.

Халуурах, нүд улайж нуухтах, арьсан дээр жижиг гүвдрүүт тууралт гарах зэрэг шинж тэмдэг илэрвэл хамгийн түрүүнд Өрхийн эмчдээ үзүүлээрэй гэж зөвлөх байна" гэлээ.

Зөвлөгөө:

• Бага насны хүүхдийг гадуур авч явахгүй, гэртээ дулаан байлгаж, асаргаа сувилгааг сайжруулах, халуурах, нус гоожих, нүд улайж нуухтах, арьсан дээр жижиг гүвдрүүт тууралт гарах зэрэг шинж тэмдэг илэрвэл харъяа Өрхийн эмчдээ хандаж үзүүлэх.
   
• Улаанбурханаар өвчилсөн сурагч, оюутнууд өвчний шинж тэмдэг илэрснээс хойш 14 хоног гэрийн нөхцөлд хэвтрийн дэглэм баримтлах.
   
• Улаанбурханы хөнгөн хэлбэрийг өрхийн эмчийн хяналт, зөвлөмжөөр гэрээр эмчилж эдгэрүүлж болно.
   
• 9 сар болон 2 нас хүрсэн хүүхдийг улаанбурханы товлолын вакцинд хамруулах,
   
• А аминдэм болон бусад аминдэмийг хэрэглэх.
   
• Амны хаалт зүүх,
   
• Даарахгүй дулаан байх,
   
• Гараа савандаж угаах.

Сэрэмжлүүлэг

ХӨСҮТ-ийн хүлээн авах тасгаар хэт олон хүмүүс ирж, дараалал үүсгэн, бусад халдварт өвчтэй хүнтэй хавьтал болох эрсдэлтэй тул Та эхлээд харьяа өрхийн эмчдээ үзүүлж, зөвлөгөө авах нь зүйтэй гэж анхаарууллаа.