ЕРӨНХИЙ САЙДЫН ХЭЛСЭН ОНЦЛОХ ЭШЛЭЛҮҮД...

Ч.Болортуяа

2015 оны 4 сарын 5

iKon.MN

Ерөнхий сайд хэд хэдэн асуудлаар олон нийтэд хандаж үг хэлнэ хэмээн зар тарааж хүлээлт бий болгоод буй. Түүний мэдэгдэл яг одоо эхэлж байна.

Бид та бүхэндээ түүний мэдэгдлээс ОНЦЛОХ ЭШЛЭЛҮҮДИЙГ нь хүргэж байна.

Ч.САЙХАНБИЛЭГ:

Оюу толгойн далд уурхайн ажлыг эхлүүлэх түүхэн шийдвэрийг гаргаснаар дэлхийн хамгийн том 14 банк 4,2 тэрбум ам.долларын хөрөнгө оруулалтыг Монгол Улсад оруулах үүд хаалгыг нээж өгч байна.
1072 хувьцааны талаар зориуд тэмдэглэн хэлэхэд хэрэв УИХ хэлэлцэн зөвшөөрвөл хувьцаа эзэмшиж байгаа 1 сая 800 мянган хүний ноогдол ашигт зөвхөн энэ жил гэхэд урьдчилгаа мөнгөнөөс хүн тус бүрт 100 мянган төгрөгийг тусгай санд хуваарилах боломж байна.
Хоёр том төслөө шийдэж байж долларын ханш буурна.
Хааны хөрөгтэй Монгол төгрөг чангарах болно.
Ноён уул байгалиас заяасан төрхтэйгээ, түүхээс өвлөсөн өвтэйгээ үлдэнэ. Харин Гацууртын ордыг ашиглах болно.
Гацууртын ордыг ашигласнаар 60 гаруй тэрбум төгрөг орон нутагтаа үлдэх болно.
Оюу толгой, Таван толгой төслүүдийг хөдөлгөж бид хөгжлийн том түгжээгээ мулталлаа.
Цаг урагшлуулсан. Одоо ажлаа урагшлуулцгаая.
Хууль тогтоох дээд байгууллагадаа анх удаа Үндэсний эв нэгдлийн, Эв эеийг эрхэмлэсэн их зөвшилцлийн үедээ бидний ард түмэнтэйгээ хамтран хүрэх ёстой түүхэн шийдвэр бол Үндсэн хуулийн нэмэлт өөрчлөлт юм.
Хөрөнгийн биржийг Лондонгийн хөрөнгийн биржийн удирдлага зохион байгуулалтаар шинэчлэх, МИАТ компанийг дотоод гадаадын холбогдох байгууллагуудтай хамтран шинэчлэн зохион байгуулах, Иргэний нисэхийг бүтэц зохион байгуулалтын шинэ хэлбэрт оруулах, төрийн өмчийн компаниудыг Сингапурын Темасек маягийн загвараар хөгжүүлэх зэрэг ажлуудыг Засгийн газар шийдвэрлэнэ.
Нийслэлийн агаарын бохирдлыг арилгахын тулд эргэлт буцалтгүй газны буюу хийн үйлдвэрийг барьж байгуулах ажлаа энэ жил эхлүүлнэ. Утааг хийн хэрэглээ л арилгана.
Нийгмийн даатгалын сангийн хөрөнгийг 8 хувийн орон сууцны зээлтэй уяна.
Гурил буудайн үнийг энэ жилээс эхлэн бирж болон зах зээлийн үнэ дээр тогтсон шинэ зөв зарчимд оруулах нь зүйтэй гэж үзэж байна.
Засгийн газар энэ оны 7 сарын 1-нээс эрчим хүчний үнэ чөлөөлөх ажлаа эхлэхээ зарлаж байна.
Засгийн газар орон нутгийн татварын шинэ тогтолцоог шийдвэрлэсэн хуулийг өргөн барина.
Ашигт малтмалын нөөцийн төлбөрийн 30 хүртэл хувийг орон нутгийн төсвийн татаасыг хасалгүйгээр тухайн нутагт нь үлдээж байх болно.
Таван толгойн төслийн хэлэлцээр төгсгөлийн шатандаа орлоо.
Цементийн эх орны гэх тодотголтой дараагийн үйлдвэрүүд энэ жил ашиглалтад ороход бэлэн болж байна.
Үйлдвэрчний эвлэл, ажил олгогчидтойгоо тохиролцсоны дагуу цалингийн нэмэгдлээ шийдэх болно.
5-р цахилгаан станцын бүтээн байгуулалтын ажлыг энэ оны долдугаар сард эхлүүлэхээ амаллаа.
Орон сууцны ипотекийн 8 хувийн зээлээ энэ жил үргэлжлүүлнэ.
Хогны үйлдвэргүй хот гэдэг тодотголоосоо Монгол Улс салах болно.
Хөрөнгийн биржийг Лондонгийн хөрөнгийн биржийн удирдлага, зохион байгуулалтаар шинэчилнэ.
Энэ дөрөв, тавдугаар саруудад Ерөнхий сайдын хувьд гадаадын хөрөнгө оруулагчдыг татах зорилгоор дэлхийн санхүү, хөрөнгө оруулалтын төв газруудтайгаа хувийнхаа компаниудтайгаа хамтран явж, идэвхтэй ажиллахаар төлөвлөж байна.
Эрчим хүчний импортлогч орноос Монгол Улс экспортлогч орон болно.
Валют орох урсгал нээх, өргөсгөх, хурдасгах хөтөлбөр хэрэгжүүлье.
Засгийн газрын гол анхаарлаа хандуулах дараагийн нэг чухал асуудал бол олон улсад “Старт ап” гэж нэрлэгддэг шинэ бизнесийг дэмжих ялангуяа, экспортод чиглэсэн үйлдвэр аж ахуйг дэмжих хөтөлбөрийг хэрэгжүүлэх асуудал байх болно.
Бид гадныхныг хардаг нүдээ өөр болгохыг онцгойлж байна.
Монголд шинэ кино студийн барилга байгууламж барьсан тохиолдолд Марко Пологийн 3,4-р цуврал, дараагаар нь Чингис хааны цуврал кинонуудыг хамтран хийхээр тохиролцлоо.
Энэ жилийн наадмаар хотын захиргаа, Бат-Үүл даргатай хамтран Чингисийн талбайд дэлхийн хэмжээний том уран бүтээлчийн концертыг зохион байгуулах болно гэдгээ амалж байна.
Дэлхийн одод Монголыг жил бүр зорьдог уламжлал энэ жилээс эхлэн тогтоно.
Нийгэмдээ эв эе, ойлголцлын уур амьсгалыг нэг хэсэгтээ бүрдүүлье.
Уул уурхайгаас гадна өөр бусад шинэ салбаруудаа нээн, хөгжүүлж эдийн засгаа солонгоруулж олон, олон өнгөтэй болгоё.
Монгол оронд гайхамшиг болдог, монголчууд амжилтанд хүрч чаддаг ард түмэн гэдгээ дахин нэг нотлоё.
Монголчууд эв эеэ нэгтгэж, Монгол эх орноо хөгжүүлэх хамтын их хүч, харилцан ойлголцолд хүрцгээе.
Монголоо саадгүй хөгжүүлцгээе.