БНСУ-ын Ерөнхий сайдыг Монгол Улсад албан ёсоор айлчлахыг урив

Манай улсад айлчилж буй БНСУ-ын Гадаад хэргийн сайд Юн Бён Сэ тэргүүтэй төлөөлөгчдийг Ерөнхий сайд Н.Алтанхуяг хүлээн авч уулзлаа.

Энэ айлчлал нь хоёр орны харилцаа, хамтын ажиллагааг гүнзгийрүүлэн хөгжүүлэхэд чухал хувь нэмэр оруулна гэдэгт итгэлтэй байгаагаа Ерөнхий сайд илэрхийлээд хоёр улсын харилцаа “Иж бүрэн түншлэл”-ийн түвшинд өргөжин хөгжиж байгаад сэтгэл хангалуун байна гэлээ.

Мөн тэрбээр, ирэх онд хоёр орны хооронд дипломат харилцаа тогтоосны 25 жилийн ойг хоёр талдаа өндөр түвшинд тэмдэглэн өнгөрүүлэх, БНСУ-д гэрээгээр болон хувиараа ажил хөдөлмөр эрхэлж байгаа монгол иргэдийн эрх ашгийг хамгаалах, иргэдийн ажиллах, амьдрах нөхцөлийг сайжруулахад анхаарч, дэмжлэг үзүүлэх, Солонгосын компаниудыг Монголд хөрөнгө оруулахыг уриалахыг Ерөнхий сайд хүслээ. 

Мөн тус улсын Ерөнхий сайдыг Монгол Улсад албан ёсоор айлчлахыг урилаа.

Ерөнхий сайд Н.Алтанхуягийг хүлээн авч уулзаж буйд БНСУ-ын Гадаад хэргийн сайд талархал илэрхийлээд хоёр орны бүх түвшний харилцааг хөгжүүлэхийн төлөө ажиллах болно гэлээ. 

Мөн тэрбээр Ерөнхий сайдын тавьсан санал хүсэлтийг Засгийн газартаа уламжлах болно гэж хэллээ гэж Засгийн газрын хэвлэл мэдээлэл, олон нийттэй харилцах албанаас мэдээллээ.