Шинэчлэлийн засгийн газар 3,1 тэрбумаар 12 автомашин худалдан авчээ

Жийп унаагүй л бол дарга биш гэдэг үг бий. Ёстой л үнэн үг.

Нэг байгууллагын даргаар ч юм уу, орлогчоор, аль эсвэл газар, хэлтсийн даргаар томилогдмогц хамгийн түрүүлж шуурхайлан авдаг арга хэмжээ нь автомашинаа сайжруулах гэж хэлэхэд хилсдэхгүй. Нэг агентлаг л гэхэд даргаас гадна орлогчтой. Тэд бүгд жийп унана. Унах унахдаа бүр “Ланд 200” юм уу “Лексус 570”, “Бенз” гээд л хамгийн үнэтэй бас томоос нь шилж унадаг. Гэхдээ ганц машин унадаг “гурай” дарга ч цөөн.

Шатахуун бага зарцуулах нэрээр хотод жижиг тэрэг унах ч хөдөө явахад хэрэгтэй хэмээн том жийп авна. Ийнхүү төсвийн мөнгөөр том, жижиг гэсэн хоёр автомашин авсан эрхэм зэрэг унах боломжгүй учир нэгээр нь эхнэр, аль эсвэл хүүхдүүдээ эрхлүүлдэг жишиг тогтоод удаж байгаа. Дарга нарын энэ хэтэрсэн тансаглалыг олон жилийн туршид ярьж, шүүмжилж байгаа боловч засч залруулдаг Засгийн газар нэг ч алга.

Харин эдийн засаг элэг дөрвөөрөө мөлхөж, бүсээ чангалах горимд ард түмнээ шилжүүлээд байгаа энэ цаг үед төсвийн мөнгөөр тансаглаж байгаа төрийн өндөр албан тушаалтнуудыг эхнээс нь ил болгож, хэмнэлтийн бодлого руу шилжүүлэхээр шийдэв бололтой. Юутай ч эхний ээлжинд Аудитын ерөнхий газраас шалгалт хийж албан ажлын суудлын автомашин хэрэглэх эрх бүхий албан тушаалтны жагсаалтад багтаагүй хэрнээ тусгай унаагаар тансаглаж буй 222 албан хаагчийг энэ Засгийн газар эрхлүүлж байгааг илчиллээ.

Ер нь манай улсын төсвөөс санхүүждэг төрийн байгууллагад нийтдээ 97 тэрбум 385 сая төгрөгийн үнэ бүхий 3299 автомашин данстай байдаг бөгөөд 2013 оны автомашины ашиглалтын зардалд 19 тэрбум 710 сая төгрөг зарцуулсан байна.

Үүнээс зөвхөн шатахуунд 13 тэрбум 294 саяыг үрсэн бөгөөд энэ нь сүүлийн гурван жилд өндөр үнэтэй, шатахуун зарцуулалт ихтэй автомашин олныг худалдан авсантай холбоотойг холбогдох байгууллага нь тогтоожээ.

Жилд дунджаар нэг автомашин 3889 литр шатахуун зарцуулдаг байна. Гэтэл сүүлийн жилүүдэд төрийн байгууллага автомашин худалдан авах нь эрс нэмэгдсэн байна.

Сүүлийн гурван жилд л гэхэд нийтдээ 197 автомашинаар төрийнхөн парк шинэчлэлт хийжээ. 2011 он буюу MAH, АН хамтарч засаг барьж байх үед гурван тэрбум гаруй төгрөгийг машин худалдан авахад зарцуулсан бол Шинэчлэлийн Засгийн газар 2013 онд энэ мөнгөний дүнг гурав дахин нэмэгдүүлж, есөн тэрбум 250 саяар машины ченжүүдийг тэтгэжээ.

Тэднээс хамгийн бийлэгжүү гэж хэлж болох нь Шүүхийн ерөнхий зөвлөлийн дарга бөгөөд тэрбээр өөрийн багцаасаа гурван тэрбум гаруй төгрөг гаргаж 38 автомашин худалдан авсан бол түүний араас Улсын ерөнхий прокурор Д.Дорлигжав орж байна. Тэрбээр прокурорын байгууллагадаа 20 шинэ машин авчээ.

Гадаад харилцааны сайд Л.Болд автомашины тоогоо 17-гоор нэмсэн нь шалгалтаар илэрчээ. Харин төсвийн мөнгийг төмөр хүлэг болгоогүй сайн сайдаар Эрчим хүчний М.Сономпил тодров.

Гэхдээ түүний авсан ганц машин нь 180 сая төгрөг “залгижээ”.

Н Алтанхуяг Ерөнхий сайдаар томилогдсоноосоо хойш хоёр жил хүрэхгүй хугацаанд хоёр тэрбум 356 сая төгрөгийг автомашин худалдаж авахад зарцуулжээ. Өнгөрсөн жил л гэхэд 777 сая төгрөгөөр автомашин авсан. Авсан машиных нь нэг бүрийн үнэ ч чамгүй өндөр.

Нийтдээ 12 машиныг гурван тэрбум 133 саяар худалдан авсан гэхээр нэг машины үнэ дор хаяж 200 гаруй сая төгрөг болж таараад буй юм. Гэтэл үүнтэй бараг адил хэмжээтэй мөнгөөр Шүүхийн ерөнхий зөвлөл 38 автомашин худалдаж авсан байдаг. Тэгэхээр Засгийн газрын түшмэлүүд хэр тансаглаж байгааг түвэггүй анзаарч болох юм. Өртөг өндөртэй, чамин автомашинаар гангарсныг Аудитын газрын хийсэн шалгалтын дүн илтгэж байна.

Угтаа бол ард түмэн Шинэчлэлийн Засгийн газраас хэмнэлтийн шинэ эрин үеийг хүлээж байсан. Учир энэ танхимд төсвийн мөнгийг хэмнэж, дарга нарыг үнэтэй том жийпнээс татгалзахыг уриалан, ард түмэнд таалагдсан Л.Гантөмөр сайд байгаа. Тэрбээр “Надад “Louis Vuitton”-ы тэлээ, "Gucce-гийн цүнх, “Ргаdо”-гийн цаг гэх мэт тансаг эдлэл байхгүй. Та харж байгаа байх.

Би хуруундаа бөгжгүй, цаггүй, энгийн “Nokia” маркийн гар утас барьдаг. Ингээд л амьдрал хэвийн үргэлжлэх ёстой. Нөгөө талдаа тодорхой орлого бидэнд бий. Үүнийг зөв зүйлд, ялангуяа хүүхдүүдээ зөв хүн болгон төлөвшүүлэхэд харамгүй зарцуулах ёстой” хэмээн ярихыг нь олон хүн сонссон. Тиймээс хэмнэгч сайдыг жинхэнэ утгаараа төрийн, төсвийн мөнгийг хэмнэж ажиллаж болдог юм гэдгийг батлах байх хэмээн хүлээж байсан. Гэвч тэр нь ердөө сонгогчдыг татах шоу байжээ.

Төрийн байгууллагуудын худалдан авсан нэг бүрийн үнэ нь 82.6 сая төгрөгөөс дээш үнэтэй суудлын автомашины тайлан