Оросын эрх баригчид генералын амийг хорлоход оролцсон Украины агентыг баривчилснаа мэдээллээ

Баасан гарагт Москвагийн ойролцоо автомашинд байрлуулсан бөмбөг дэлбэрсний улмаас Оросын зэвсэгт хүчний жанжин штабын өндөр албан тушаалтан амь үрэгдсэн билээ.

Тэгвэл Оросын холбооны аюулаас хамгаалах алба уг халдлагыг үйлдсэн Украины тагнуулыг баривчилснаа Бямба гарагт зарлажээ.

“Украины тусгай албаны агент Игнат Кузин гар аргаар бүтээсэн тэсрэх бөмбөгийг Volkswagen Golf загварын автомашинд байрлуулж, генерал Ярослав Москаликийн амийг хөнөөсөн“ гэж тус байгууллага мэдээлсэн байна.

Москвагийн дагуул хот Балашиха дахь гэрийнхээ гадаа алхаж явсан Москалик уг автомашины дэргэдүүр өнгөрөх үед бөмбөг дэлбэрсэн юм.

Кузиний байрлуулсан автомашин дахь бөмбөгийг Украинаас идэвхжүүлснийг тогтоосноо холбооны аюулаас хамгаалах алба мэдээлжээ.

Сэжигтнийг 2023 онд Украины тусгай албанд элссэн, тухайн оныхоо есдүгээр сард Москвад ирсэн гэж бас мэдээлсэн байна.

Оросын хэвлэлүүд түүнийг баривчилж байгааг, бас мэдүүлэг өгч байгааг харуулсан дүрс бичлэгүүдийг цацжээ.

Одоогоор Украины тал уг аллагад оролцсон эсэхээ батлаагүй байна.

Баасан гарагт Кремлийн хэвлэлийн алба Киевийн дэглэм “манай улсын нутаг дэвсгэрт террорист үйл ажиллагаагаа үргэлжлүүлсээр байна” хэмээн Украиныг буруутгаж байв.

Генерал Москалик 2015 онд Донбассын салан тусгаарлах дайны асуудлыг зохицуулах зорилготой Минскийн олон улсын яриа хэлэлцээнд оролцсон ОХУ-ын төлөөлөгчдийн бүрэлдэхүүнд багтаж байжээ.

Эх сурвалж: BBC