Hyundai Motor компани гадаадын шилдэг инженерүүдийг ажилд шалгаруулж авах хөтөлбөрөө зарлалаа
Өмнөд Солонгосын томоохон компаниудын нэг Hyundai Motor өнөөдөр гадаадаас салбар салбарын шилдэг инженерүүдийг ажилд авах хөтөлбөрөө зарлажээ.
Маргааш буюу Мягмар гарагаас тус компани докторын (Ph.D) зэрэгтэй гадаадын инженерүүдийг ажилд шалгаруулж авах, бас бакалавр, магистрын зэрэгтэй мэргэжилтнүүдийг дадлагажигчаар авах бүртгэлийг эхлүүлэхээр болсон байна.
Ажил горилогчид нь шаардлагатай инженерийн мэргэжлээр 2026 оны наймдугаар сараас өмнө докторын зэрэг хамгаалсан буюу хамгаалахаар төлөвлөсөн байх ёстой гэнэ.
Сонирхож буй салбарууд нь их өгөгдөл, хиймэл оюун ухаан, батарейн технологи, устөрөгчийн түлш, үйлдвэрлэлийн автоматжуулалт, робот техник, кибер аюулгүй байдал, шинэ үеийн агаарын тээвэр (AAM-Advanced Air Mobility) зэрэг байх гэнэ.
Hyundai компани ажлын байр горилогчдыг тавдугаар сард шалгаруулж, зургаадугаар сард ярилцлага зохион байгуулахаар төлөвлөжээ.
Тэнцсэн мэргэжилтнүүд тус компанийн Өмнөд Солонгос дахь Namyang Research & Development Center төвд урилгаар ажиллах юм байна.
Дадлагажигчийн хөтөлбөр нь энэ оны долоо, наймдугаар саруудад таван долоо хоногийн сургалтаар эхлэх бөгөөд эндээс шалгарсан мэргэжилтнүүдэд ажлын байр санал болгох гэнэ.
Өргөдлийг “http://talent.hyundai.com” хаягаар авах юм байна.
Эх сурвалж: Yonhap News
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
