П.Мөнхзаяа: Гадна хаягийг монгол хэлээр бичиж байршуулах стандарттай

Гэрэл зургийг MPA агентлагийн онцгой зөвшөөрөлтэйгөөр ашиглав

Улаанбаатар хотын өнгө үзэмжийг сайжруулах, иргэдийн эрүүл, ая тухтай орчинд амьдрах эрхийг хангах, явган хүний зам, талбайн хүрэлцээ хангамжийг нэмэгдүүлэх зорилгоор нийслэлийн есөн дүүргийн нутаг дэвсгэрт нийтийн эзэмшлийн зам талбайн зөрчил арилгах ажлыг энэ сарын 10-ны өдрөөс эхлүүлээд буй. 

Хяналт шалгалтаар хаяг, самбар, гадна тохижилтын орчинтой холбоотой зөрчлүүд ихээр илэрч байгаа аж.

Энэ тухай Нийслэлийн Хяналт, Шалгалтын Газрын  Орчны аюулгүй байдлын хяналтын хэлтсийн ахлах мэргэжилтэн П.Мөнхзаяа "Нийслэлийн хэмжээнд худалдаа үйлчилгээний чиглэлээр 18,600 гаруй аж ахуйн нэгж, байгууллага үйл ажиллагаа явуулдаг гэсэн судалгаа бий. Үүний 70 хувь нь стандартын шаардлага хангаагүй бөгөөд ихэнх нь гадна хаяг, хаягийн байгууламж, орчны стандартыг хангахгүй байгаа зөрчлүүд байна. Иймээс бид 2022 онд батлагдсан гадна хаягийн хотын стандартын шаардлагуудыг хангуулахаар аж ахуйн нэгжүүдэд зөвлөмж хүргэн ажиллаж байна.

Стандартад гадна хаягийн байгууламжийг тухайн барилгын гадна фасадын 20 хувиас хэтрэхгүй, нэг орон зайд жигд хэмжээтэйгээр байршуулна гэж заасан төдийгүй хамгийн гол шаардлага нь гадна хаягийг монгол хэлээр бичиж байршуулна гэж тусгасан байдаг. 

Бид эхний ээлжид мэдэгдлийг тухайн иргэн, аж ахуйн нэгжид хугацаат үүргийг хүргүүлж байгаа бөгөөд өгсөн хугацаанд зөрчлөө арилгаагүй тохиолдолд албадан буулгах хүртэлх арга хэмжээг хэрэгжүүлэхээр ажиллаж байна" гэв.

Баянзүрх дүүрэгт гэхэд гадна хаяг, хаягийн байгууламж, орчны стандартыг мөрдөөгүй 500 гаруй зөрчил илэрчээ.

ХУДАЛДАА, ҮЙЧИЛГЭЭНИЙ ГАЗРЫН ГАДНА ОРЧНЫ ЕРӨНХИЙ ШААРДЛАГА

Гадна орчны ерөнхий шаардлага,

• Гадна орчинд сул шороон хөрс байлгахгүй, ногоон байгууламж, зам талбайг тохижуулах
• Гэрэлтүүлэг нь худалдаа үйлчилгээний газрын гадна орчныг бүхэлд нь гэрэлтүүлдэг байх
• Хог хаягдал түр хадгалах цэгт байрлах хогийн саванд хог хаягдлыг ангилан хаях бөгөөд ангиллын дагуу өнгө, тэмдэг, тэмдэглэгээтэй байна. 
• Зогсоолыг явган хүний болон тусгай хэрэгцээт иргэдэд зориулсан зам, автомашины хөдөлгөөний эрчим, зогсоолын эрэлттэй уялдуулан шинээр байгуулах байгууламжийн зураг төсөлд тусгаж төлөвлөнө. 

Гадна хаяг, зар сурталчилгааны байгууламжид тавигдах шаардлага 

• Орчин үеийн технологийн шийдлийг ашигласан байх бөгөөд засвар үйлчилгээг тогтмол хийж, бүрэн бүтэн байдлыг хангуулна.
• Хотын гудамж, барилга байгууламжийн нэгдсэн өнгө төрхтэй уялдуулна. 
• Барилгын аюулгүй, бүрэн бүтэн байдал, өнгө үзэмжийг алдагдуулахгүй байх. 
• Хаягийг монгол хэлээр бичнэ. Англи хэлээр бичих тохиолдолд монгол бичвэрийн доод талд эсвэл хойно хоёр дахин бага хэмжээгээр бичнэ. 
• Хаягийг байрлуулахдаа нэг орон зайд нэг жигд загвар, хэмжээтэй байх зарчмыг баримтлах. 
• Зохиогчийн эрхээр баталгаажсан бараа бүтээгдэхүүний логог өөрчлөхгүй. 
• Хаягийн нийт хэмжээ фасадын 20 хувиас хэтрэхгүй. 
• Хаяг нь гадна, дотор гэрэлтүүлэгтэй байх ба бүх байгууллагын мэдээллийг агуулсан нэгдсэн мэдээллийн байгууламж байршуулна.