Boeing компани АНУ-ын шинэ үеийн байлдааны нисэх онгоцыг зохион бүтээхээр болсныг Трамп зарлав

АНУ-ын ерөнхийлөгч Дональд Трамп өчигдөр тус улсын зэвсэгт хүчний дараа үеийн байлдааны нисэх онгоцыг Boeing компани зохион бүтээхээр болсныг зарлажээ.

NGAD (Next Generation Air Dominance) хөтөлбөрийн хүрээнд бүтээгдэх уг нисгэгчтэй онгоц дайсны агаарын хамгаалалтын системийг нэвтлэх чадвараараа өнөөдрийн онгоцнуудаас хол илүү байх гэнэ.

Boeing компани энэ төслийн эхний шатанд АНУ-ын засаг захиргаанаас $20 тэрбумын санхүүжилт авахаар болсон байна.

Онгоцыг F-47 гэж нэрлэхээр тогтсон нь АНУ-ын 47 дахь ерөнхийлөгч Дональд Трампыг бэлгэджээ.

АНУ-ын агаарын хүчний командлагч, генерал Дэвид Алвин “Бид орчин үеийн агаарын дайны дараагийн түүхийг үүгээр бичих болно” гэж мэдэгдсэн байна.

 

АНУ-ын одоогийн хамгийн хүчирхэг байлдааны нисэх онгоц F-35-ийг Lockhead Martin компанид зохион бүтээж байгаа. Пентагон энэ онгоцыг бүтээх төсөлд  нийтдээ $1.7 их наядыг зарцуулах тооцоотой байгаа ч бүрэн дуусаагүй байна.

F-35 онгоцны хэт өндөр зардал, үр ашиггүй байдал нь сүүлийн үед нэлээд шүүмжлэл дагуулах болсон юм.

Одоогоор 1,100 гаруй F-35 онгоцыг АНУ болон түүний холбоотнуудын захиалгаар үйлдвэрлээд байна.

Үүнээс гадна Пентагон шинэ үеийн бөмбөгдөгч нисэх онгоц B-21 Raider-ийг бүтээх төсөлд ихээхэн хөрөнгө мөнгө зарцуулж байгаа.

Эхний B-21 одоо туршигдаж байгаа бөгөөд эхний ээлжид АНУ 100 ширхэг ийм бөмбөгдөгчтэй болоход $130 тэрбумыг төсөвлөжээ.

Гэхдээ Трампын зарласан шинэ үеийн байлдааны онгоц бүтээх төсөл нисгэгчгүй онгоц буюу дроны ач холбогдол өсөн нэмэгдэж байгаа энэ үед зөв эсэхэд зарим судлаачид эргэлзэж байна.

Өнгөрсөн онд АНУ-ын ерөнхийлөгч Жо Байдены засаг захиргааны үеийн агаарын хүчний командлагч Фрэнк Кендал шинэ үеийн нисэх онгоц бүтээх хэрэгцээ байгаа эсэхийг дахин нягтлах, хэрэгцээ байгаа тохиолдолд хэрхэн орчин үеийн дайнд зориулан өөрчилж сайжруулах боломжтойг судлах зорилгоор 2018 онд анх эхэлж байсан NGAD хөтөлбөрийг түр зогсоох тушаал өгч байжээ.

Тушаалын дагуу ажилласан стратеги судлаачид NGAD-ыг цааш үргэлжлүүлэх нь зөв, ялангуяа Хятад улстай мөргөлдөөн үүссэн тохиолдолд ийм онгоцны хэрэгцээ зайлшгүй гэсэн дүгнэлт гаргасан байна.

Үүний дараа Кендал шинэ үеийн байлдааны нисэх онгоцыг аль компаниар бүтээлгэх шийдвэрийг Трампын засаг захиргаанд үлдээж байсныг Пентагоны эх сурвалж мэдээлжээ.

Одоо Пентагон хиймэл оюуны технологийг сайжруулах замаар NGAD хөтөлбөрийн хүрээнд бүтээгдэх шинэ онгоцны нисгэгчгүй буюу дрон хувилбарыг гаргахаар төлөвлөөд буйг дээрх эх сурвалж бас мэдээлсэн байна.

Эх сурвалж: Associated Press