"Мөрөөдлийн театр"-ын уран бүтээлчид зохиогчдын эрх зөрчсөн гэв
Монгол Улсын Соёлын Гавьяат Зүтгэлтэн, Д.Нацагдоржийн шагналт, "Болор цом"-ын эзэн А.Эрдэнэ-Очир агсны "Голын тохой дээр" хэмээх шүлэг бий. Тус бүтээлийг "Мөрөөдлийн театр"-ынхан зохиолчийн эрхийг эзэмшигчдийн зөвшөөрөлгүйгээр "Самсара- Тэртээх хоёр зүрх" драмынхаа дуу болгон Youtube хуудсандаа байршуулсан юм.
Энэ асуудалтай холбогдуулан Монголын Зохиолчдын Эвлэлээс өчигдөр мэдэгдэл гаргажээ.
Уг мэдэгдэлд
"“Мөрөөдлийн театр”-ын жүжигчид тайзнаа шинээр тавьж буй “Самсара - Тэртээх хоёр зүрх” драмын жүжигтээ Монгол Улсын Соёлын гавьяат зүтгэлтэн, Д.Нацагдоржийн шагналт зохиолч, “Болор цом”-ын эзэн яруу найрагч Арлааны Эрдэнэ-Очирын “Голын тохой дээр” шүлгийг зохиогчийн эрхийн зөвшөөрөлгүй ашиглаж, улмаар олонд алдаршсан уг бүтээлийн халдашгүй байдалд халдсан үйлдлийг Монголын Зохиолчдын Эвлэл эрс эсэргүүцэж байна.
Энэхүү хууль бус үйлдлээ даруй таслан зогсоож, яруу найрагчийн үр хүүхэд уг бүтээлийн эрх эзэмшигчдээс албан ёсоор уучлал гуйн, түүнийгээ олон нийтийн сүлжээнд байршуулж, бүтээлийн нэр хүндийг сэргээх, “Самсара-Тэртээх хоёр зүрх” жүжгийн хэсэг, сурталчилгаанд ашиглахгүй байхыг “Мөрөөдлийн театр”-ын уран бүтээлчдээс шаардаж байна.
Цаашид Монголын зохиолч, яруу найрагчдын бүтээл туурвилд эрээ цээргүйгээр халдаж, зохиогчийн эрхийн зөвшөөрөлгүйгээр арилжааны зорилгоор ашиглах, дур мэдэн өөрчлөн найруулах (үгийг нь солих, засах, хасах, зохиолчийн илэрхийлэх гэсэн санаа, утгыг мушгин гуйвуулах) зөрчил гаргасан, түүнийг түгээсэн аливаа байгууллага, студи, продакшн, уран бүтээлчдэд зохих хариуцлага тооцуулахаар төр, хяналтын байгууллагад хандахаа мэдэгдье!" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
