Парисын олимпын үеэр дэгдсэн боксчдын хүйсийн маргаан Оросын суртал нэвтрүүлгийн үйл ажиллагаа байсан гэв

2024 оны Парисын зуны олимпын наадмын үеэр дэгдэж байсан эмэгтэй боксчдын хүйстэй холбоотой маргаан Оросын талаас явуулсан худал мэдээлэл түгээх ажиллагааны үр дүн байсныг Олон Улсын Олимпын Холбооны (ОУОХ) ерөнхийлөгч Томас Бах өчигдөр мэдэгджээ.

Сүүлийн 12 жилийн турш дэлхийн хамгийн том спортын байгууллагыг удирдаж байсан Бах ирэх зургаадугаар сард үүрэгт ажлаа шилжүүлэх гэж байгаа юм.

Түүний залгамжлагчийг ирэх Пүрэв гарагт сонгоно.

Дээрх асуудлаас гадна өөр олон асуудлаар Оросын тал Парисын олимпын өмнө болон хойно худал мэдээлэл тараах кампанит ажиллагаа явуулж байсныг Бах баталсан байна.

 

ОУОХ-ны ерөнхийлөгч Томас Бах

Засаглалын болон санхүүгийн олон асуудалтай байсан Олон Улсын Боксын Холбооны (ОУБХ) эрхийг өнгөрсөн онд ОУОХ цуцалж, Парисын наадмын боксын тэмцээнийг өөрөө зохион байгуулсан юм.

ОУБХ-г тэргүүлдэг Оросын бизнесмэн Умар Кремлев үүний хариуд хүйсийн асуудалтай хоёр эмэгтэй тамирчныг олимпын наадамд оролцуулсан хэмээн ОУОХ-ыг буруутгаж байжээ.

Кремлев нь Оросын эрх баригчидтай ойр хэлхээ холбоотой нэгэн юм.

“Парисын наадмын үеэр дэгдсэн маргаан бодит байдал дээр тийм ноцтой юм биш байсан. Үүнийг Оросын талаас явуулсан худал хуурамч мэдээллийн кампанит ажил дэвэргэж байсан юм” гэж Бах тайлбарлажээ.

Тэрбээр цааш нь “Энэ бол Парисын наадмын өмнө болон хойно Оросын талаас явуулсан олон ийм ажлын зөвхөн нэг хэсэг байсан” гэж хэлсэн байна.

Тухайлбал ОУОХ-ны мэдээлэлд нэвтрэх кибер халдлага олон удаа гарч, Африкийн Олимпын Хорооны нэрийг барьсан хуурамч утасны дуудлага өөрт нь ирж байсныг Бах энэ үеэр дурджээ.

Маргааны бай болсон хоёр тамирчин өмнө нь 2021 оны Токиогийн олимп болон ОУБХ-ны зохион байгуулсан өөр олон тэмцээнд асуудалгүй оролцож байсан гэнэ.

“Энэ маргаан бодит байдалтай ямар ч хамаагүй байсан. Хоёр тамирчин эмэгтэй хүн болж төрсөн, эмэгтэй хүн болж хүмүүжсэн, эмэгтэйчүүдтэй өрсөлдөж, ялагдаж, ялж ирсэн хүмүүс” гэж Бах хэлжээ.

ОУБХ-ны нөхцөл байдлаас болоод боксын спорт 2028 оны Лос-Анжелесийн олимпын наадмаас хасагдахаар болоод байв.

Тэгвэл Бах боксыг олимпын төрөлд буцааж оруулах тухай сайхан мэдээ удахгүй гарч магадгүйг өчигдөр дуулгасан байна.

Өнгөрсөн сард ОУОХ боксын спортыг шинээр төлөөлөх байгууллага Дэлхийн Боксын Холбоог зарчмын хувьд хүлээн зөвшөөрсөн юм.

“Дэлхийн Боксын Холбоог хүлээн зөвшөөрсөн нь ойрын үед эерэг алхам хийх дохио юм. Ирэх долоо хоногт Грект болох ОУОХ-ны хурлаар уг асуудал шийдэгдэнэ гэдэгт би итгэлтэй байна” гэж тэр хэлжээ.

Эх сурвалж: Reuters