АНУ-ын судалгааны станц саран дээрээс буулгасан нар хиртэлтийн зургийг дэлхийд ирүүлжээ

Гуравдугаар сарын 2-ны өдөр Firefly Aerospace компанийн Blue Ghost судалгааны станц саран дээр амжилттай газардсан билээ.

Ингэснээр тус компани дэлхийн дагуул дээр станцаа буулгасан АНУ-ын хоёр дахь хувийн өмчийн байгууллага болсон юм.

Тэгвэл Blue Ghost станц саяхан дэлхийн зарим хэсэгт ажиглагдсан сарны бүтэн хиртэлтийг саран дээрээс гэрэл зурагт буулгаж чаджээ.

Дэлхий дээр ажиглагдсан сарны хиртэлт нь саран дээрээс ажиглахад нарны хиртэлт болж харагддаг.

Өөрөөр хэлбэл дэлхий нь нар, сар хоёрын дунд орж, бүгд нэг шугам дээр давхцан байрласан гэсэн үг юм.

“Firefly компанийн Blue Ghost станц гуравдугаар сарын 14-нд тохиосон нарны бүтэн хиртэлтийг саран дээрээс буулгаж чадлаа. Энэ бол түүхэнд анх удаа хувийн компанийн станц нарны хиртэлт болох үед саран дээр үйл ажиллагаа явуулж байсан тохиолдол юм. Бид буулгасан зургаараа үнэхээр их бахархаж байна” гэж тус компани мэдэгджээ.

“Бүтэн хиртэлтийн үед бараг таван цаг харанхуй байсан нь хүнд сорилт байлаа. Энэ үед сарны гадаргын температур Цельсийн -100 хэмээс доош унаж, нарнаас эрчим хүч авах боломжгүй болсон тул зөвхөн батарейгаар ажилласан юм” гэж Blue Ghost станцын ахлах инженер Уилл Кооган тайлбарласан байна.

Үүнээс өмнө саран дээр нарны хиртэлтийг зурагжуулсан ганцхан тохиолдол байсан нь 1967 онд Аполло багийн аялалд шаардлагатай мэдээллийг цуглуулахаар саран дээр ажиллаж байсан НАСА-гийн Surveyor 3 станцын зураг байжээ.

Blue Ghost станц энэ оны нэгдүгээр сарын 15-нд дэлхийгээс хөөрснөөсөө хойш өөрийн аяллын гайхалтай зургуудыг ирүүлсээр байгаа.

Тус станц НАСА-гийн шинжлэх ухааны судалгаа, туршилтын 10 багаж төхөөрөмжийг тээвэрлэж яваа юм. Эндээс цуглуулсан мэдээлэл нь саран дээр хоёр дахь удаагаа хүн буулгах АНУ-ын Артемис хөтөлбөрт ашиглагдах ажээ.

Эх сурвалж: CNN