"The MongolZ" баг "ESL Pro League Season 21" тэмцээнд III байр эзэлснээр 80,000 ам.долларын шагнал хүртэж байна

Цахим спортын "Counter Strike 2" тоглоомын "ESL Pro League Season 21" тэмцээний Playoffs буюу шөвгийн дөрвөн багийн тоглолт өнөөдөр боллоо. 

Шведийн Стокхольм хотод зохиогдож буй тус тэмцээний шөвгийн наймд манай улсын "The MongolZ" баг дэлхийн аварга Украины "Natus Vincere" багтай "Во3" (гурван "map"-аар ялагчийг тодруулах) журмаар өнгөрсөн шөнө тоглож, 2:0-оор хожсон. 

Үргэлжлүүлэн шөвгийн дөрөвт дэлхийн чансааг тэргүүлэгчдийн нэг болох Францын "Team Vitality" багтай "Во3" журмаар тоглож, 1:2-оор ялагдлаа. 

Манай улсын багийн хувьд өөрсдийнхөө сонгосон "Anubis map" дээр тааруухан үзүүлэлттэй тоглож, 4:13-аар хожигдсон. Харин француудын сонгосон "Nuke map" дээр хамгаалах талаасаа эхэлж 8:4-өөр байраа сольсон хэдий ч хангалтгүй довтолсны улмаас нэмэлт үе гаргасан юм.

Улмаар нэмэлт үед 16:14-өөр хожиж, "Team Vitality" багийг анх удаа энэ тулааны дээр буулган авсан. Нэгэнт тооны харьцаа тэнцсэн тул ялагчийг сүүлийн "Inferno map" дээр шийдвэрлэхээр болсон ч манай улсын баг 2:13-аар хожигдлоо.

Ийнхүү тэд "ESL Pro League Season 21" тэмцээнд 3-4 дүгээр байр эзэлж, 80,000 ам.долларын шагналын санг хүртэж байна. Үүний 25,000 ам.долларыг тоглогчдод, 55,000 ам.долларыг "The MongolZ" гэх цахим спортын багт нь хуваан өгнө.