Украинтай сайн энхийн гэрээ байгуулахгүй бол Оросыг хориг арга хэмжээгээр шийтгэхээ АНУ анхааруулав

Өчигдөр Германы Мюнхен хотод эхэлсэн олон улсын аюулгүй байдлын чуулганд оролцогчдын анхаарлын төвд Украины сэдэв байлаа.

Сар хүрэхгүй хугацааны өмнө тангараг өргөсөн АНУ-ын ерөнхийлөгч Дональд Трампын гадаад бодлогын эргэлтүүд дэлхий нийтийг доргиож буй цаг үед уг арга хэмжээ зохион байгуулагдаж байна.

Мюнхений чуулганд АНУ-ыг дэд ерөнхийлөгч Жэй Ди Вэнс төлөөлөн оролцож байгаа юм. Түүнтэй хамт төрийн нарийн бичгийн дарга Марко Рубио, Пентагоны тэргүүн Пэт Хэгсэт нар оролцож байна.

Өчигдөр НАТО-гийн ерөнхий нарийн бичгийн дарга Марк Рюттетэй уулзахаасаа өмнө Вэнс “Мэдээж бид Украин-Оросын мөргөлдөөн болон түүнийг хэрхэн яриа хэлэлцээрийн замаар шийдвэрлэх талаар ярилцах болно” гэж мэдэгджээ.

Дараа нь тэр “The Wall Street Journal” сонинд ярилцлага өгөхдөө Украин улсын аюулгүй байдлыг урт хугацаанд баталгаажуулсан энхийн гэрээ байгуулахаас татгалзвал АНУ-ын засаг захиргаа Оросын эсрэг хориг арга хэмжээ, тэр ч байтугай цэрэг зэвсгийн хүч хэрэглэж болзошгүйг анхааруулсан юм.

“Эдийн засгийн арга хэрэгслүүдээс гадна бас цэрэг зэвсгийн хүчийг ашиглах боломжтой. Олон хувилбар томьёолол, тохиролцоо байж болох ч бид Украины бүрэн эрхт тусгаар тогтносон байдалд санаа тавих болно” гэж Вэнс энэ үеэр хэлжээ.

 

АНУ-ын дэд ерөнхийлөгч Жэй Ди Вэнс

Энэ долоо хоногт ерөнхийлөгч Дональд Трамп утсаар ОХУ-ын ерөнхийлөгч Путинтэй ярьсан нь Оросын талд хэт ашигтай гэрээ байгуулж, өөрсдийнх нь аюулгүй байдлыг алдагдуулж болзошгүй гэсэн түгшүүрийг Европын удирдагчдад төрүүлсэн юм.

Өчигдөр Германы гадаад хэргийн сайд Анналена Баербок “Украинчууд болон Европчуудын толгой дээр хуурамч энх тайван тогтоох нь ямар ч ашиггүй. Хуурамч энх тайван Украинд, Европт, АНУ-д ч тогтвортой байдал авчрахгүй” гэж мэдэгджээ.

Гурван жил орчмын өмнө эхэлсэн дайны турш Оросын арми Украины газар нутгийн 20 орчим хувьд хяналтаа тогтоогоод байгаа.

Вэнстэй уулзахаасаа өмнө НАТО-гийн тэргүүн Марк Рютте “Бид энхийн яриа хэлэлцээ эхлэхээс өмнө Украины байр суурийг хэрхэн хамгийн өндөр түвшинд гаргах талаар ярилцах болно. Путин дахин хэзээ ч бусниулж чадахааргүй урт удаан энх тайван тогтоох нь чухал” гэж хэлсэн байна.

Германы Бавари мужийн төвд жил бүр зохион байгуулагдаж, дэлхийн томоохон удирдагчид, цэргийн мэргэжилтнүүд, дипломатчидыг цуглуулдаг арга хэмжээг эхлэхийн өмнөхөн дэд ерөнхийлөгч Жэй Ди Вэнс өөрийгөө батлан хамгаалахын тулд Европ ихийг хийх ёстой гэсэн Трампын шаардлагыг уламжилсан юм.

“НАТО-гийн ачааг Европ илүү их хуваалцдаг болбол Зүүн Азийн бүс нутагт тулгарч байгаа сорилтуудад АНУ илүү их анхаарал тавих боломжтой болно” гэж тэр сэтгүүлчдэд ярьсан нь Хятад улсыг хэлсэн хэрэг байв.

Рютте ч энэ саналыг “туйлын зөв” гээд “Бид энэ чиглэлд илүү өсөж, илүү их мөнгө зарцуулах ёстой” гэж хэлжээ.

Энэ долоо хоногт АНУ-ын батлан хамгаалахын сайд Пэт Хэгсэт хэвлэлд ярихдаа Украины хилийг 2014 оныхоор сэргээх боломжгүй, Украиныг НАТО-д элсүүлэх зорилт нь бодит байдалд нийцэхгүй гэж мэдэгдсэн.

Уг мэдэгдэлд Европын зарим холбоотнууд эсрэг байр суурьтай байна.

Тухайлбал Их Британийн ерөнхий сайд Кир Стармер саяхан Украины ерөнхийлөгч Володимир Зеленскийтэй утсаар ярихдаа “Украинд аюулгүй байдлын баталгаа, зэр зэвсгийн тусламж, цаашдын тусгаар тогтнол хэрэгтэй. Энэ тал дээр Их Британид найдаж болно” гэж хэлснийг түүний хэвлэлийн алба мэдээлжээ.

Өчигдөр сэтгүүлчидтэй уулзахдаа Зеленский “Бид Орост газар нутгаа алдсан Украины ерөнхийлөгч гэсэн нэрээр түүхэнд бичигдмээргүй байна” гэж сэтгүүлчдэд хэлсэн юм.

Үүнээс гадна Киевийн эрх баригчид саяхан газрын ховор элемент нийлүүлэх гэрээний төслөө АНУ-ын талд санал авахаар хүргэсэн тухай Мюнхений чуулганд оролцож буй Украины төлөөлөгчдийн эх сурвалж мэдээлжээ.

Дэд ерөнхийлөгч Вэнс өмнө нь сенатор байхдаа Украинд үзүүлж буй АНУ-ын тусламжийг хүчтэй эсэргүүцэгчдийн нэг байсан юм.

2022 онд тэр нэг подкаст нэвтрүүлгээр ярихдаа “Украинд юу болж байгаа нь надад огт падгүй” гэж хэлж байжээ.

Украины ерөнхийлөгч Зеленский, АНУ-ын дэд ерөнхийлөгч Вэнс нарын тэргүүлсэн төлөөлөгчдийн уулзалт өчигдөр өглөө төлөвлөгдсөн байсан нь хойшлогдож, нэлээд оройтож эхэлсэн байна.

Эх сурвалж: Reuters