Өмнөд Солонгосын нисэх буудлуудыг хариуцдаг төрийн өмчит компанийн захирал асан нас баржээ

Өмнөд Солонгосын төрийн өмчит Korea Airports Corp компанийн гүйцэтгэх захирал асан гэртээ нас барсныг олсон талаар тус улсын цагдаагийн байгууллага өчигдөр мэдээлжээ.

Нас барсан Сон Чан Ван нь 2018-2022 оны хооронд Өмнөд Солонгосын нисэх буудлуудыг хариуцдаг дээрх компанийн гүйцэтгэх захирлаар ажиллаж байсан юм.

Түүнийг ажиллаж байх үед Муан хотын олон улсын нисэх буудлын тоног төхөөрөмжийг шинэчлэх төсөл хэрэгжиж байжээ.

Үүнд нисэх онгоцнуудыг газардахад шаардлагатай мэдээллээр хангадаг “локалайзер” хэмээх систем багтаж байсан юм байна.

Өнгөрсөн сард Муан хотын нисэх буудалд Jeju Air компанийн Boeing 737-800 онгоц газардах үеэрээ осолдож, 179 хүн амиа алдсан билээ.

Уг онгоц дугуй нь дэлгэгдээгүйн улмаас элгээрээ газардсан ч буух зурвасын төгсгөлд байсан локалайзерын бетон хашааг мөргөсний улмаас дэлбэрч, бүрэн шатсан юм.

Уг бетон хашааг зурвасын төгсгөлд ойрхон байгуулсан нь ослын хор хохирлыг улам нэмэгдүүлсэн гэж мэргэжилтнүүд үзэж байгаа.

Муан нисэх буудлын локалайзерыг 2020 онд шинэчилж байжээ.

Мөрдөгчид Сон Чан Ваны үхлийн шалтгааныг тогтоох ажлыг эхлүүлсэн байна.

Эх сурвалж: Yonhap News