Сургуулийн өмнөх боловсролын сургалтын хөтөлбөрт хүүхдийн хэл ярианы чадварыг хөгжүүлэх агуулга тусгахыг үүрэг болгов
Боловсролын сайдын шуурхай хуралдаан болж, салбарт хэрэгжиж буй цаг үеийн ажлуудыг хэлэлцжээ.
Нийслэлийн нэгдүгээр ангийн сурагчдыг бие даалтын долоо хоногт багтаан нүд, шүд, зүрх судасны үзлэгт хамруулна. Энэ хүрээнд Боловсролын яам, Эрүүл мэндийн яам, “Орбис интернэйшнл” олон улсын байгууллага хамтран ерөнхий боловсролын 50 сургуульд хараа шалгах багц хүлээлгэн өгөөд байна.
Мөн Монгол хэл, бичгийн элсэлтийн шалгалтыг ерөнхий боловсролын сургуулийн сурагчид 10 дугаар ангиасаа эхлэн өгөх боломжийг нээх тухай асуудлыг Засгийн газрын хуралдаанаар хэлэлцүүлэхээр тогтоолын төслийг боловсруулж байгаа юм.
Сургуулийн өмнөх боловсрол болон бага ангийн сургалтын хөтөлбөр, агуулга, сурах бичгийг шинэчлэх ажил үргэлжилж буй. Одоогийн байдлаар агуулгын хүрээг тодорхойлон, судлагдахууны хөтөлбөр, туршилтын сургалтын төлөвлөгөөг боловсруулж байна.
Сургуулийн өмнөх боловсролын сургалтын хөтөлбөрт хүүхдийн хэл ярианы чадварыг хөгжүүлэх агуулгыг тусгах, бага ангийн сурах бичгүүдийг интерактив болгон шинэчлэхдээ хиймэл оюун ухаан ашиглах зэргийг Боловсролын сайд П.Наранбаяр холбогдох албаныханд даалгав гэж Боловсролын Яамнаас мэдээллээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
