Байден ерөнхийлөгчөөр ажиллах үлдсэн хугацаагаа Украины байр суурийг бэхжүүлэхэд зориулах гэнэ

АНУ-ын ерөнхийлөгч Жо Байден бүрэн эрхийнхээ үлдсэн хугацааг Украины байр суурийг бэхжүүлэхэд зориулахаар төлөвлөснийг түүний зөвлөх Бямба гарагт мэдэгджээ.

Ирэх ерөнхийлөгчийн сонгуульд Бүгд Найрамдах Намын нэр дэвшигч Дональд Трамп ялбал Украины дэмжлэг сулрах нь тодорхой болоод байгаа.

Байден ирэх оны нэгдүгээр сард ерөнхийлөгчийн үүрэгт ажлаа шинэ ерөнхийлөгчид шилжүүлэх ёстой.

Тэгвэл Байден үлдсэн дөрвөн сарын хугацаагаа Украины байр суурийг хамгийн сайн түвшинд хүргэж, бэхжүүлэхэд зориулах төлөвлөгөөтэй байгааг Цагаан ордны үндэсний аюулгүй байдлын зөвлөх Жэйк Салливан өчигдөр мэдэгджээ.

“Ерөнхийлөгч Зеленский энэ дайн эцэстээ яриа хэлэлцээгээр дуусах нь тодорхой болохыг хэлсэн. Тиймээс бид Украиныг энэ яриа хэлэлцээнд давамгай байр суурьтай оролцоход шаардлагатай бүх зүйлийг хийх хэрэгтэй” гэж тэр Киев хотод өчигдөр зохион байгуулагдсан Виктор Пинчук Сангийн чуулганд видео холбоогоор оролцохдоо хэлсэн юм.

АНУ-ын ерөнхийлөгч Байден есдүгээр сарын сүүлээр болох НҮБ-ын ерөнхий ассамблейн чуулганы үеэр Зеленскийтэй уулзахыг Салливан баталсан байна.

Энэ уулзалтын үеэр хоёр удирдагч Украины дэмжлэгийг хэрхэн нэмэгдүүлэх асуудлаар ярилцах гэнэ.

“Украин улс энэ дайнд зоригтой, чухал алхам хийж чадсан. Гэхдээ Покровск орчмын нөхцөл байдал бидний санааг зовоосон хэвээр байна” Салливан хэлжээ.

Наймдугаар сарын 6-нд Украины зэвсэгт хүчин ОХУ-ын Курск мужийн нутаг дэвсгэрт довтолж, нэлээд хэмжээний газар нутагт хяналтаа тогтоосон ч Донецкийн чиглэлийн фронт дээр Оросын армийн довтолгоо үргэлжилсээр байгаа.

Одоо стратегийн чухал ач холбогдолтой Покровск хотоос 10 км зайд ширүүн тулаан үргэлжилж байна.

Киевийн эрх баригчид Өрнөдийн амласан зэр зэвсгийн тусламж хугацаандаа нийлүүлэгдэхгүй байгааг шүүмжилдэг.

“Энэ бол улс төрийн хүсэл сонирхлын асуудал биш. Логистикийн хэцүү төвөгтэй асуудлыг даван туулах нь бидний хувьд нэн чухал болоод байна” гэж удаашралын шалтгааныг тайлбарласан Салливан өөрийнх нь талд илүү их ажиллах шаардлагатай байгааг хүлээн зөвшөөрсөн байна.

Эх сурвалж: AFP