"ЗГ-ын бүтэц, үйл ажиллагааны хөтөлбөр боловсруулах зэрэг асуудлаар бусад нам, эвсэлтэй зөвшилцөх ажлыг эхлүүлж байна"

Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Ардын Нам(МАН)-ын Удирдах Зөвлөл(УЗ) өнөөдөр хуралдлаа. 

Шийдвэрийг тус намын нарийн бичгийн дарга Н.Энхбаатар танилцуулав.

Тэрбээр "Үндсэн дөрвөн асуудлыг хэлэлцэн шийдсэн.

1. УИХ дахь 68 гишүүнтэй бүлэг байгуулах шийдвэр гаргалаа.
2. УИХ-ын даргын томилгооны асуудлыг хэлэлцлээ. Шинэ УИХ-ын даргаар МАН-ын Ерөнхий нарийн бичгийн дарга, Засгийн Газрын Хэрэг Эрхлэх Газрын даргаар ажиллаж байсан Д.Амарбаясгаланг томилсон.
3. УИХ-ын даргаар томилогдсон тул намын Ерөнхий нарийн бичгийн даргаас чөлөөлөгдөх хүсэлтээ Д.Амарбаясгалан дарга албан ёсоор УЗ-д гаргасныг хүлээн авч, дүрмийн дагуу Бага хурлаас дараагийн Ерөнхий нарийн бичгийн даргыг томилох хүртэл хугацаанд Ерөнхийлөгчийн Тамгын Газрын дарга Я.Содбаатарыг үүрэг гүйцэтгэгчээр томилж байна. 
4. Намын дарга, УИХ-ын дарга, Я.Содбаатар дарга нарын бүрэлдэхүүнтэй ажлын хэсэг байгууллаа. Тус ажлын хэсэг нь Үндсэн хуулийн өөрчлөлтийг амилуулах, хууль эрх зүйн орчны шинэчлэлийг хийх ажлын хүрээнд бусад нам эвсэлтэй зөвшилцөх, дараагийн Засгийн Газар(ЗГ)-ыг байгуулах, шинэ ЗГ-ын мөрийн хөтөлбөр, бүтэц бүрэлдэхүүний асуудлаар УИХ-д суудалтай бусад нам, эвсэлтэй санал солилцоно" гэлээ.

Мөн тэрбээр "Энэ удаагийн парламентад таван нам, эвсэл багтсан. Намууд бүгд мөрийн хөтөлбөрөө дэвшүүлсэн бөгөөд ард иргэд тэдгээрийг үзэж судалж, саналаа өгсөн. Иймд иргэдийн саналаа өгсөн мөрийн хөтөлбөрүүдээс хэрэгжүүлж болох, хамтарч ажиллах боломжтой зорилтуудыг ЗГ-ын мөрийн хөтөлбөрт тусгах, цаашид хамтарч ажиллах бололцоог судлах хүрээнд зөвшилцлийн ажлыг өнөөдрөөс эхлүүлж байгаа. Тодорхой хугацаанд зөвшилцсөний дараа ЗГ болон бүлгийн дарга, УИХ-ын дэд дарга нар, ЗГ-ын бүрэлдэхүүний асуудлыг ярина" хэмээв.

"Үндэсний их баяр наадмаас өмнө ЗГ-ын бүтэц бүрэлдэхүүнийг баталж, үйл ажиллагааны хөтөлбөрийг боловсруулах зэрэг ажлыг хийж дуусгахаар төлөвлөж байгаа. Гэхдээ таван нам, эвсэлтэй зөвшилцөх учраас хугацаа шаардлагатай. Зөвшилцөл амжилтад хүрвэл цаашдаа хамтарч ажиллах асуудал яригдана" гэж МАН-ын нарийн бичгийн дарга Н.Энхбаатар нэмж дурдлаа.