126 гишүүнтэй парламентын онцлох дүр төрхүүд

Монгол Улсын Их Хурлын шинээр сонгогдсон 126 гишүүн өнөөдөр парламентын гишүүний үнэмлэхээ гардан авч, бүрэн эрхээ баталгаажуулах гэж байна. 

Монгол Улсын парламент түүхэндээ анх удаа хамгийн олон буюу 78 гишүүнийг сонгож, 48 хүн намын жагсаалтаар төрийн эрх барих дээд байгууллагын гишүүн болсон нь энэ удаагийн сонгуулийн онцлог байв. 

Түүнчлэн нам, эвслүүд жагсаалтаар нэр дэвшүүлэхдээ 1:1 хүйсийн харьцаатай жагсаалтын дарааллыг үндэслэн нэр дэвшүүлнэ гэдэг хуулийн заалт баримтлахаас гадна нийгмийн бүх талын төлөөллийг хангаснаа зарлаж байсан. 

Энэ зарчмын дагуу бүрдсэн парламентад үндэсний цөөнхийн төлөөлөл болсон казах эмэгтэй, хөгжлийн бэрхшээлтэй болон тусгай хэрэгцээт иргэдийн төлөөлөл хоёр иргэн сонгогдсон нь Ардчилсан Үндсэн хуульт парламентын түүхэнд анх удаа гэж хэлж болохуйц үйл явдал юм. 

УИХ-ын 2024 оны сонгуулийн дүнд бүрэлдэж буй парламентын онцлох дүр төрхүүдийг танилцуулж байна. 

МАН-аас жагсаалтын 4-рт бичигдэн нэр дэвшсэн О.Саранчулуун. Тэрбээр "Бүх нийтийг спортод хамруулах замаар хөгжлийн бэрхшээлтэй хүн бүрийг хөгжүүлж, өөртөө итгэх итгэл, амьдралын чанарыг нь дээшлүүлнэ" уриатай Achilles International Mongolia төрийн бус байгууллагын тэргүүн. Тус байгууллага нь хөгжлийн бэрхшээлтэй иргэдийг хамруулсан марафон зохион байгуулах, гаднын улс орнуудын ижил төрлийн арга хэмжээнд оролцох тамирчдаа дэмжих зэрэг арга хэмжээ явуулдаг.  

О.Саранчулуун нь хөрөнгө орлогын мэдүүлгээ нийт хөрөнгийн хэмжээгээ 463 сая төгрөг хэмээн мэдүүлжээ. Түүний өөрийн орлого 44 сая, гэр бүлийн орлого нь 158 сая төгрөг бөгөөд 250 сая төгрөгийн үнэлгээтэй нэг орон сууц, 5 сая төгрөгийн үнэлгээ бүхий Nissan| March маркийн автомашинтай гэж хөрөнгө орлогын мэдээллээ гаргажээ. 

АН-аас жагсаалтын 7-рт бичигдэн нэр дэвшсэн тэргэнцрийн тусгай хэрэгцээт иргэн Ж.Баясгалан. 2020 онд АН-аас нэр дэвшиж байсан тэрбээр энэ удаад жагсаалтаас УИХ-д орж ирлээ. Хөгжлийн бэрхшээлтэй буюу тусгай хэрэгцээт иргэдийн нийгмийн асуудлын талаар идэвхтэй дуугарсаар ирсэн түүнийг бодлого боловсруулагчийн түвшинд ажиллах болсныг талархалтай хүлээж авч буйгаа олон хүн илэрхийлсэн. Ж.Баясгалан нь 7,515,804.990 төгрөгийн хөрөнгөтэй бөгөөд 4.1 тэрбумын үл хөдлөх, 515 сая төгрөгийн тээврийн хэрэгсэл, 1.5 тэрбумын мал аж ахуй болон 7 компанийн хувь эзэмшдэг болохоо хөрөнгө орлогын мэдүүлэгтээ тусгажээ. 

Шинэ парламентын бас нэгэн онцлох гишүүн бол Иргэний Зориг Ногоон Намын жагсаалтын 4 дүгээрт бичигдсэн С.Замира. Эдийн засагч мэргэжилтэй тэрбээр үндэсний цөөнх тэр дундаа болох казах эмэгтэйчүүдийн төлөөлөл болж байгаа нь олны анхаарал татаад буй.

С.Замира 316 сая төгрөгийн хөрөнгөтэй, өөрийн орлого 8.5 сая төгрөг, 115 саяар үнэлэгдэх хашаа байшин, 165 сая төгрөгийн газартай хэмээн хөрөнгө орлогоо мэдүүлсэн байна.