"Алиса - Төсөөллийн хүч" хүүхдийн жүжиг энэ сарын 31-нд нээлтээ хийнэ

Dream Day буюу Мөрөөдлийн Өдөр театрын цоо шинэ бүтээл “Алиса – Төсөөллийн хүч” жүжиг шинээр мэндэлж байна. Хүүхдийн жүжиг хэмээх тодотголтой боловч бүх насныхан үзэхэд уйдамгүй, үйл явдал өрнүүн энэ жүжгийг Английн зохиолч Льюис Кэроллын алдарт “Алиса Гайхамшгийн оронд” зохиолоос сэдэвлэн бүтээж байгаа аж. 

Жүжгийн хамт олон “Боломжгүй зүйл гэж байхгүй, бүх зүйл боломжтой. Гагцхүү чи өөрөө дотроо төсөөлж чадвал боломжгүй зүйлийг ч бүтээх хүч чиний дотор бий” гэсэн мэссэжийг үзэгчдээ хүргэхээр зорьж буй гэнэ.

Авьяас чадвар нь ид оргилж, шинэлэг бүхнийг үзэгчдэдээ өргөн барихыг тэмүүлж буй мэргэжлийн залуу уран бүтээлчдээр багаа бүрдүүлсэн бөгөөд гол дүрүүдийг УДЭТ-ын авьяаслаг жүжигчид бүтээж байгаа ажээ.

Хүүхдийн баярыг тохиолдуулан 5 сарын 31-нд нээлтээ хийх уг жүжиг ердөө таван өдөр Монголын Хүүхдийн Ордонд тоглогдоно. Урлагаар дамжуулж ирээдүй хойч болсон хүүхдүүдэд боловсрол олгох, хүмүүжил олгох алсын хараатай Dream Day театрын хамт олны хоёр дахь бүрэн хэмжээний тайзны бүтээл хүүхэд бүрийн хүсэн хүлээж үздэг үзвэр болно гэдэгт итгэлтэй байгаагаа илэрхийлсэн юм.

АЛИСА – ТӨСӨӨЛЛИЙН ХҮЧ ЖҮЖГИЙГ ҮЗЭХ 3 ШАЛТГААН

1. ТЭР ЧИГТЭЭ БАЯРЫН УУР АМЬСГАЛ

 

Dream Day театр нь сүүлийн 20 жил тасралтгүй Монголын хамгийн шилдэг арга хэмжээ, үйл ажиллагаа, ёслол хүндэтгэл ба баярын чимэглэл, декорын ажлыг гүйцэтгэж ирсэн Эм Си Пи ХХК-ийн дэргэдэх хүүхдийн театр билээ. Тиймээс тоглолтод зорьж очсон хүүхдүүд, эцэг эхчүүддээ зориулж Монголын Хүүхдийн Ордоны угтах хэсгийг гайхалтай баярын уур амьсгалтайгаар чимэглэх юм. Фото зураг авхуулж гайхалтай дурсамжаа зурагт үлдээх хамгийн содон засал угтах нь.

Алисатай өдөр бүр баярын өдөр байх болно!

2. МЭРГЭЖЛИЙН ЖҮЖИГЧИД

 

Хүүхдийн уран бүтээл байх тусмаа чанартай байх ёстой гэдэг үндсэн зарчим баримталж ажилладаг Dream Day театрын удирдлага өнөө цагт ид оргилж яваа авьяаслаг, чадварлаг залуу жүжигчдээр уран бүтээлчдийн багаа бүрдүүлжээ.

1. Алисагийн дүрд УДЭТ-ын жүжигчин Т.Анхзул тоглож байна. Тэрбээр Dream Day театрын анхны бүтээл “Мэлхий Гүнж” жүжгийн гол дүр болох Мэлхий гүнжид тоглож хүүхэд багачуудад хэдийнээ танил болсон жүжигчин билээ. Мөн тэрбээр УДЭТ-ын тайзнаа тоглогддог “Ромео Жульетта” жүжгийн гол дүр Жульеттагийн дүрд тоглодог ба Монгол улсын 5 дахь Жульетта гэдгээр нь үзэгчид андахгүй.

Т.Анхзул: “Хүүхдийн жүжгийн хамгийн гоё, нандин хэсэг нь манай үзэгчид байдаг. Хүүхдийн жүжигт тайзнаа тоглох бүрдээ маш их хайр, аз жаргал мэдэрдэг. Алисагийнхаа шинэ дүрээр тайзнаа гарахыг тэсэн ядан хүлээж байна”

2. Малгайчингийн дүрд УДЭТ-ын жүжигчин Г.Ганбат

3. Улаан хатны дүрд жүжигчин Ч.Энхтуяа

4. Цагаан хатны дүрд жүжигчин, найруулагч Т.Дашсурмаа

5. Хулганын дүрд УДЭТ-ын жүжигчин И.Дашнамжил

6. Хүлэг баатарын дүрд жүжигчин Т.Анхбаяр

7. Хэниш болон Авгалдайн дүрд жүжигчин Г.Эрдэнэболд

8. Туулайн дүрд жүжигчин М.Мөнгөнсүх

9. 2 ихрийн дүрд жүжигчин А.Энхжин, Б.Үүрцайх нар тус тус тоглож байна.

3. ХАМГИЙН ГОЁ ХӨГЖИМ

Авьяаслаг хөгжмийн зохиолч, найруулагч Д.Нямхүү, Х.Цэцэн нар зөвхөн “АЛИСА – Төсөөллийн хүч” жүжигт зориулсан цоо шинэ хөгжим бичиж байгаа бөгөөд бүтэн цомгийн хэмжээний нууцлаг, үлгэрийн мэт мэдрэмж өгөх хөгжмийн бүтээл төрж байгаа юм.

Хөгжимтэй, бүжигтэй, өвөрмөц тайз засалтай, төсөөллийн ертөнцийг тайзнаа амилуулах мэргэжлийн багийн хамтын бүтээл “АЛИСА-Төсөөллийн хүч” жүжгийн хүүхдүүддээ үзүүлж гэр бүлээрээ хамтдаа мартагдашгүй дурсамж бүтээгээрэй.

Дэлгэрэнгүй мэдээллийг дараах холбоосоор авна уу. 

www.facebook.com/dreamdaykids

www.ticket.mn/event/1637/