Улаанбаатар хотод эмэгтэй гадаад хэргийн сайд нарын уулзалт зохион байгуулагдана

Гэрэл зургийг mpa.mn

Гадаад харилцааны сайд Б.Батцэцэгийн санаачилгаар эмэгтэй гадаад хэргийн сайд нарын уулзалтыг энэ оны зургаадугаар сарын 29-30-ны өдөр Улаанбаатар хотод зохион байгуулна.

Энэхүү уулзалтад 42 улсын эмэгтэй гадаад хэргийн сайд нар, НҮБ болон олон улсын байгууллагын удирдлагад ажиллаж буй эмэгтэйчүүдийг оролцуулахаар бэлтгэл хангаж байгаа аж.

Уулзалтын талаар Гадаад харилцааны яам "Сүүлийн жилүүдэд феминист гадаад бодлогын үзэл баримтлалтай улс орнууд улам нэмэгдэж байна. Эл үзэл баримтлал Швед улсад анх үүсэж, тус улсын Гадаад хэргийн сайд Марго Валлстром дэлхийн анхны феминист гадаад бодлогыг 2014 онд танилцуулсан. Өдгөө Испани, Канад, Ливи, Люксембург, Мексик, Норвеги, Франц, Швед, Герман зэрэг олон улс орон феминист гадаад бодлогыг хэрэгжүүлж байна.

Олон улсад хийсэн судалгаанууд охид, эмэгтэйчүүдийг чадавхжуулах нь ядуурлыг бууруулах хамгийн үр дүнтэй шийдэл, өрх, нийгмийн болон улсын эдийн засгийг өөрчлөх хүчирхэг хөдөлгүүр мөн болохыг нотлон харуулдаг.

Иймээс феминист гадаад бодлоготой орнууд жендэрийн тэгш байдал, эмэгтэйчүүдийг чадавхжуулах, тэдний эрхийг хамгаалахад чиглэсэн төсөв, хөрөнгийг нэмэгдүүлэхэд чиглэсэн олон улсын бодлого хэрэгжүүлдэг.

Монгол Улс үндэсний хэмжээнд жендэрийн тэгш байдлыг хангах бодлого, үйл ажиллагааг тууштай хэрэгжүүлсэн. Мөн олон улсын түвшинд феминист гадаад бодлогыг баримтлан охид, эмэгтэйчүүдийн эрхийг хамгаалахад чиглэсэн санал, санаачилгуудыг дэмжиж, НҮБ-ын энхийг сахиулах ажиллагаанд оролцож буй эмэгтэйчүүдийн тоог тогтмол нэмэгдүүлж ирсэн.

Эмэгтэйчүүдийн оролцоо нь зөрчил мөргөлдөөн, хүчирхийлэлд хамгийн ихээр өртдөг хүүхэд, эмэгтэйчүүдэд тулгарч байгаа хүндрэл бэрхшээлийг сайтар ойлгон, даван туулахад тэдэнд туслан эв эеийн бүлээн уур амьсгал, энэрэнгүй соёлыг түгээж байдгаараа олон улсын энх тайван, аюулгүй байдлыг хангах зорилгод илүүтэй нийцдэг байна.

Энэ ч утгаараа дээрх уулзалт нь дэлхийд тулгамдаж буй олон улсын энх тайван, аюулгүй байдал, уур амьсгалын өөрчлөлт болон хүнсний аюулгүй байдлын асуудлаар санал солилцож, шийдвэрлэхэд дөхөм үзүүлнэ гэдэгт итгэлтэй байна" хэмээн мэдээллээ.

Эх сурвалж: Гадаад харилцааны яам