Сүхбаатарын талбай чиглэлийн 129 нийтийн тээврийн автобус 2-6 цагийн хугацаагаар зогсжээ

Гэрэл зургийг MPA агентлагийн онцгой зөвшөөрөлтэйгөөр ашиглав

Сүхбаатарын талбайд болж буй жагсаалаас үүдэн нийтийн тээврийн автобус явахад саад учирсан учир Тээврийн цагдаагийн албатай хамтран ажиллаж байгаа талаар Нийтийн тээврийн бодлогын газраас мэдээллээ. 

Нийтийн тээврийн автобуснуудын чиглэлд дараах зохицуулалтыг хийж байгаа юм байна. 

• Энхтайваны өргөн чөлөө Сүхбаатарын талбайн орчим баруунаас ирсэн тээврийн хэрэгслийг Цэцэг төвөөр хойш нь,
• Зүүнээс ирсэн тээврийн хэрэгслийг МУБИС-иар хойш нь эргүүлж,
• Урдаас ирсэн автобусыг Нэгдүгээр сургуулиар эргүүлэхээр зохицуулалт хийн ажиллаж байгаа юм байна. 

Өнөөдөр нийт 960 нийтийн тээврийн автобус үйлчилгээнд гарсан ч жагсаал цуглаан зохион байгуулагдсантай холбоотойгоор өдөр 12:00 цагаас эхлэн Сүхбаатарын талбай хавийн зам хаагдаж, тус чиглэлд явдаг нийт 35 чиглэлийн 284 нийтийн тээврийн автобусны чиглэлд өөрчлөлт орсон байна. 

Үүнээс 129 нь 2-6 цагийн хугацаагаар зогссон бол 155 орчим тээврийн хэрэгслийг өөр замаар тойруулах зэрэг чиглэлийг өөрчилж ажиллажээ.