"Хүүхдийн тоглоомын талбай болон хөшөө дурсгал, сургууль цэцэрлэгийн гадна орчныг угааж цэвэрлэнэ"
Өнөөдрөөс эхлэн нэр сарын аяныг эхлүүлж байгаа талаар Улаанбаатар хотын Захирагчийн ажлын албанаас өнөөдөр мэдээллээ.
Хотын даргын хэвлэлийн төлөөлөгч Н.Сугар "Хаврын их цэвэрлэгээний аяныг нэг сарын хугацаатайгаар зохион байгуулахаар боллоо" хэмээн хэлэв.
Бүх нийтийн их цэвэрлэгээ дөрөвдүгээр сарын 14-нд болно.
Хотын ерөнхий менежер М.Баяраа "Сарын аяны хүрээнд нийтийн эзэмшлийн гудамж, зам талбай, гуу жалганд бөөгнөрсөн хогийг цэвэрлэх, айл өрх, ААН-ийн эзэмшлийн хашаанд хуримтлагдсан хог хаягдлыг ачих, гэрлийн шон, хайсыг угаах, шон дээр наасан зарлал, хөшөө дурсгал, хогийн сав, сандал, хайс, хашлагыг угааж цэвэрлэх, байгууллагуудын хаягийг сэргээх, өнгийг сэргээх, хүүхдийн тоглоомын талбайг угаах ажлууд хийгдэнэ.
Цэвэрлэгээ нийслэлийн 9 дүүрэгт 42 хоног үргэлжилнэ. Энэ долоо хоногт нийтийн тээврийн автобуснуудыг дотор, гаднагүй угааж цэвэрлэнэ.
Мөн их дээд болон ЕБС, цэцэрлэгийн гадна орчныг угааж цэвэрлэнэ.
Нийтийн байгууламжуудыг эвдэж сүйтгэх, ил задгай бие засах, хогоо хаях үзэгдэл хэвийн болсон тул иргэдийг соён гэгээрүүлэх ажлууд хийгдэнэ" гэв.
Энэ жил ногоон байгууламжийг нэмэгдүүлнэ. Улаанбаатар олон улсын түвшинд хүрсэн мега хот болсон. 3D цэцэрлэгт хүрээлэнгүүд, гэр хороололд бичил ногоон байгууламжууд бий болгох аж.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
