"Казахстан улс гүтгэх үйлдэлд эрүүгийн хуулиар хариуцлага тооцохгүй байх хүмүүнлэг бодлого баримталж байна"

"Дижитал Алматы-2023" олон улсын форум хоёрдугаар сарын 2, 3-нд Казахстан улсад болох гэж байна.

Уг хуралд дэлхийн 30 орны 15,000 гаруй зочин төлөөлөгч оролцох төлөвтэй байгааг тус улсын хэвлэлд онцолжээ. 

Энэхүү арга хэмжээтэй холбогдуулан Казахстан улсын Гадаад Харилцааны Яамнаас өчигдөр мэдээлэл хийв.

Казахстан улс гадаад бодлогын хүрээнд төв Азийн бусад улс оронтой хэрхэн хамтарч ажиллаж буй талаар болон ялангуяа, дижитал дэд бүтэц, шинэ технологийг хөгжүүлэх чиглэлд ямар бодлоготой байгаа тухай тус улсын Гадаад хэргийн дэд сайд Р.Василенко дараах хариултыг өглөө. 

 

Тэрбээр "Сүүлийн таван жилийн хугацаанд Казахстан болон төв Азийн улс орнууд нягт хамтын ажиллагаатай байгаа. Бид эхний ээлжид дижитал дэд бүтцийг чадавхжуулах шаардлагатай байна. Түүнчлэн бусад олон салбарт анхаарлаа хандуулж, улс орнуудтай хамтран ажиллах нь чухал. 

Дижитал дэд бүтэц бол маш чухал салбар. Тиймээс ч цахим шилжилтэд анхаарах нь нэн тэргүүний зорилт. Үүнийг хөгжүүлэхийн тулд суурь асуудал болох тээврийн дэд бүтцийг сайжруулах болно” хэмээн хэлсэн юм.

Түүнчлэн уг хэвлэлийн хурлын үеэр Казахстан улсын дотоод бодлогын өөрчлөлт, шинэчлэлийн талаар танилцууллаа. 

Казахстан улсын ерөнхийлөгч Касым-Жомарт Токаев өнгөрсөн онд үндсэн хуульд нэмэлт өөрчлөлт оруулах улс төрийн томоохон шинэчлэлийг хийхээр иргэдийнхээ дунд санал асуулга явуулжээ. Тухайн санал асуулгад иргэдийн дийлэнх хувь нь дэмжсэнээр дараах өөрчлөлтүүд гарсан байна.

Тодруулбал, 

• Өмнө нь тайван жагсаал цуглаан зохион байгуулахын тулд эрх баригчдаас зөвшөөрөл авах шаардлагатай байжээ. Шинэчлэл хийгдсэний дараа тайван жагсаал хийх гэж байгаа талаар холбогдох газарт мэдэгдэхэд хангалттай. Үзэл бодлоо илэрхийлж, тайван жагсаал цуглаан зохион байгуулсан тоо 2017 онд 36 байсан. Харин өнгөрсөн онд 577 жагсаал болжээ.
• Бусдыг гүтгэх үйлдэлд өмнө нь эрүүгийн хуулиар хариуцлага хүлээлгэдэг байсан бол шинэчлэлийн дараа эрүүгийн хуулийн тус заалтыг гэмт хэрэг гэж үзэхгүй байх, илүү хүмүүнлэг болгоход анхаарч байгааг албаныхан онцолж байв.
• Ерөнхийлөгчийн ойрын төрөл төрөгсөд өмнө нь төрийн болон төрийн өмчит компаниудад ажиллаж болох зохицуулалттай байсан. Шинэчлэлийн дараа ерөнхийлөгчийн ойр дотно хүмүүс төрийн эрх бүхий албан тушаалд томилогдож ажиллахыг хориглосон аж.