Гэрэл зургийг MPA агентлагийн онцгой зөвшөөрөлтэйгөөр ашиглав

Сэтгэцийн эрүүл мэндийн өнөөгийн байдал, цаашид анхаарах асуудлууд үндэсний чуулган өнөөдөр болж байна. 

Тус чуулганд Хүүхэд, өсвөр насныхны нийгэм, сэтгэл зүйн талаар олон улсад баримталж буй бодлого хамтын ажиллагаа сэдвээр НҮБ-ын Хүүхдийн сангийн Өсвөр үеийнхний асуудал хариуцсан мэргэжилтэн Д.Болорчимэгийн танилцуулсан илтгэлээс онцлох эшлэлийг хүргэж байна. 

• Монгол Улсад өсвөр үеийнхний амиа хорлолтын үзүүлэлт Зүүн Ази, Номхон Далайн бүсийн орнуудын дундаж үзүүлэлтээс тав дахин их байна. 
• Нас, хүйсээр нь авч үзвэл 16-17 насны охидын 32 хувьд амиа хорлох бодол төрж байсан. 
• Өсвөр үеийнхэн ямарваа бэрхшээлийг даван туулах чадвартай болох эсвэл хэнд хандахаа мэддэг байх нь чухал байна. 
• Сайн дурын ажилд оролцсоноор өсвөр насны хүүхдийн нийгэм, сэтгэл зүйн ур чадвар хөгжинө. Ингэснээр өсөж хөгжих, хариуцлагатай иргэн болох, нэгэндээ нөлөөлж, дэмжих суурь нь тавигддаг.
• Өсвөр үеийнхэнд ээлтэй эрүүл мэндийн үйлчилгээг бий болгох нь чухал. Ялангуяа сэтгэцийн эрүүл мэндийн асуудлаар. Аймаг, нийслэлийн сургуулиудад байгаа өсвөр үеийн эмч нарыг энэ чиглэлээр сургах хэрэгтэй.
• Сургуулийн эмч, сэтгэл зүйч, нийгмийн ажилтан нь маш чухал үүрэгтэй ажиллах хүмүүс. 
• Гэр бүл, эцэг эхийн дэмжлэг мөн чухал. 
• Эцэг, эхчүүд хүүхдүүдээ "Сайн хүн бол", "Хичээлдээ сайн сур" гэж маш их шаардлага тавьдаг нь хүүхдүүдэд дарамт болдог. 
• Хичээлээс гадуур үйл ажиллагааг дэмжихээр эко клуб, бие хамгаалах урлагийн клуб зэргийг хичээллүүлж байна. Ингэхэд бие хамгаалах урлагаар суралцаж буй хүүхдүүд өөртөө итгэлтэй, өөрийгөө илэрхийлэх ур чадвартай, багаар ажиллах чадвартай болсон зэрэг нь ажиглагдсан. 
• Өсвөр үеийнхний сэтгэл зүйн асуудал нь салбар дундын асуудал учир өөрсдийн салбарт юу хийж болох талаараа тунгааж, хамтарч ажиллах нь чухал байна. 

В.Баярмаа: Өмнөговь аймгийн өсвөр насны хоёр хүүхэд тутмын нэг нь тулгамдсан асуудалтай гэх судалгаа гарсан

Түүнчлэн Сэтгэцийн Эрүүл Мэндийн Үндэсний Төв(СЭМҮТ)-ийн Ерөнхий захирал В.Баярмаа Монгол Улс дахь сэтгэцийн эрүүл мэндийн салбарын хөгжлийн талаар танилцуулах үеэрээ 11 аймаг, нийслэлийн таван дүүрэгт хийсэн судалгааны үр дүнг мэдээлсэн юм. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Түүнээс уг судалгааны талаар тодрууллаа. СЭМҮТ-ийн Ерөнхий захирал В.Баярмаа "2013 оноос эхлэн СЭМҮТ өсвөр насны хүүхдүүдийн дунд зонхилон тохиолдож буй зан үйлийн эмгэгийг тогтоох судалгааг хийсэн. Үүнд 11 аймаг, таван дүүргийг хамруулж, 2,250 хүүхэд, тэдний эцэг эх, анги удирдсан багш нарыг оролцуулсан. Үр дүнгээс үзэхэд

• 60.5 хувь нь эрүүл
• 30.5 хувь нь тулгамдсан асуудалтай
• есөн хувь нь зан үйлийн эмгэгтэй гэж гарсан. 

Энэхүү судалгааны аргачлалаар Говь-Алтай, Өмнөговь аймагт судалгаа хийж үзэхэд, улсын дундаж 30.5 байхад Говь-Алтай аймагт 36.1, Өмнөговь аймагт 51.3 хувь гэж гарсан. Үндсэндээ Өмнөговь аймгийн өсвөр насны хоёр хүүхэд тутмын нэг нь тулгамдсан асуудалтай гэж гарч байгаа юм" гэлээ. 

Иймд НҮБ-ын Хүүхдийн сангаас Говь-Алтай аймагт системтэйгээр төсөл хэрэгжүүлэхээр сонгосон байна. Тодруулбал, суурь судалгаа хийж, аргачлалаа боловсруулан, төв байгуулах, ажиллах хүмүүсээ сургах гэх зэргээр өсвөр үеийнхний сэтгэцийн эрүүл мэндэд чиглэсэн төслийг хэрэгжүүлэхээр болжээ. 

Мөн СЭМҮТ-ийн ерөнхий захирал В.Баярмаа хүүхдэд чиглэсэн сэтгэцийн эрүүл мэндийн бодлого чухал байгааг онцолж, талууд үүнд анхаарах шаардлагатайг хэлж байв. Одоогоор хийгдэж буй судалгаа, төсөл хөтөлбөрийн үр дүн нь багадаа хоёр жил, холдоо 5-10 жилийн дараа харагдаж гэдгийг ч тэрбээр мөн нэмж хэллээ.