Японы хамгийн том якүза бүлэг цаашид дахин “асуудал гаргахгүй”-гээ цагдаагийн байгууллагад амлажээ

Японы хамгийн том якүза бүлэг өөрөөсөө салж гарсан бүлгүүдтэй явуулж буй дайнаа зогсоох амлалтыг цагдаагийн байгууллагад бичгээр өгсөн тухай албаны эх сурвалж өчигдөр мэдээлжээ.

Ямагүчи-гүми нэртэй тус бүлэг 2015 онд өөрөөс нь салсан гишүүдийн байгуулсан бүлгүүдтэй цуст дайн эхлүүлж байсан юм.

Тус бүлгийн ахлагч нарын бичсэн “дахин ямар ч асуудал үүсгэхгүй”, “бүх зөрчлийг зогсооно” гэсэн үгстэй захиаг Даваа гарагт Японы баруун бүсийн Хёго мужийн цагдаагийн байгууллагад биечлэн хүргэжээ.

Японы эрх баригчид 2020 оноос хойш хүчирхийллийг зогсоохын тулд тэдний үйл ажиллагааг эрс хязгаарлах арга хэмжээ авч эхэлсэн юм.

Тухайлбал тодорхой нутаг дэвсгэрт оффис ашиглахыг нь хориглох зэрэг арга хэмжээнүүдийг авч байжээ.

Ямагүчи-гүмигийн ирүүлсэн амлалт нь дээрх хязгаарлалтуудыг цуцлуулах зорилготой байж магадгүйг орон нутгийн хэвлэлүүд мэдээлсэн байна.

Гэхдээ тус бүлгээс салж байгуулагдсан бүлгүүд ямар байр суурьтай байгаа нь тодорхойгүй байгаа гэнэ.

Ямагүчи-гүмигийн амлалт зөвхөн нэг талынх байж болзошгүй гэж цагдаагийнхан үзэж байгаа юм байна.

Италийн мафи, Хятадын триадаас ялгаатай нь якүза бол Японы нийгэмд хууль ёсны дагуу оршсоор ирсэн үзэгдэл юм.

Тэд үйл ажиллагаагаа ил явуулж, өөрийн төв оффистой байдаг.

Якүза нь дэлхийн хоёрдугаар дайны дараах эмх замбараагүй байдал дээр үүсэн бий болсон байгууллага юм.

Тэд хар тамхи, биеэ үнэлэлт, рекэт, цагаан захтны гэмт хэрэг зэрэг олон төрлийн үйл ажиллагаанд оролцдог.

Эхэн үедээ Японы эрх баригчид якүзаг нийгэмд дэг журам тогтооход нөлөөтэй гэж үздэг байжээ.

Гэвч сүүлийн жилүүдэд тэдний үйл ажиллагааг хязгаарлах бодлогыг эрчимтэй хэрэгжүүлснээр эдийн засгийн хүч чадал нь буурч, гишүүдийн тоо нь ч ихээр цөөрсөн юм.

Тухайлбал 2024 онд якүза нарын тоо 18,800 орчимд хүрсэн нь түүхэн доод үзүүлэлт болжээ.

Сүүлийн жилүүдэд якүза нарын үйл ажиллагаа, нөлөө сулрахын зэрэгцээ тэднээс тэс өөр хөнгөн бүтэц, зарчимтай ажилладаг токүрю нэртэй гэмт хэргийн бүлэглэлүүдийн үйл ажиллагаа нэмэгдэж буй тухай Японы үндэсний цагдаагийн байгууллагын саяхны тайланд дурдсан байна.

Токүрю нь байнгын бүтэцтэй бус, тухайн гэмт хэрэг бүрд зориулан түр зуурын зохион байгуулалтад ордог хувь хүмүүс ажээ.

Тэдний олонх нь хүчирхийллийн бус гэмт хэрэг буюу сошиал сүлжээ ашиглан залилан, луйврын үйл ажиллагаа явуулдаг байна.

Эдгээрийн зарим нь якүза нартай хамтрах болсноор Японы гэмт хэргийн ертөнц улам нарийн, төвөгтэй болж байгааг цагдаагийн газрын тайланд бичжээ.

Эх сурвалж: AFP