Мобиком Групп 2025 оны шилдэг татвар төлөгчөөр шалгарлаа

Монгол Улсын нийгэм, эдийн засгийн хөгжилд бодитой хувь нэмэр оруулж  “Шилдэг татвар төлөгч”-өөр шалгарсан байгууллагуудаас  том сегментийн шилдэг татвар төлөгчөөр Мобиком групп 5-д эрэмбэлэгдлээ.

Энэ жил Мобиком группийн 30 жилийн ой тохиож байгаа бөгөөд энэхүү үйл явдал нь өнгөрсөн хугацаанд бүтээсэн үнэ цэнэ, тогтвортой өсөлт, хариуцлагатай үйл ажиллагааг баталгаажуулсан үр дүн юм.

Сүүлийн таван жилийн хугацаанд Мобиком групп нийт 607 тэрбум төгрөгийн татвар, шимтгэлийг төвлөрүүлж, зөвхөн 2025 онд 164 тэрбум төгрөгийг улсын төсөвт оруулсан нь улсын эдийн засагт оруулж буй бодит хувь нэмрийг илтгэж байна. Бид жил бүр тогтвортой ажлын байрыг нэмэгдүүлж, өнөөдөр 1,800 гаруй хүнийг орон даяар ажлын байраар ханган ажиллаж, мэргэжлийн чадварлаг боловсон хүчнийг бэлтгэн хөгжүүлэхэд тууштай хөрөнгө оруулсаар байна.

2025 онд Мобиком группийн компаниуд нийт 579 тэрбум төгрөгийн худалдан авалт хийснээс 153 тэрбум төгрөгийг дотоодын 558 аж ахуйн нэгж, бизнес эрхлэгч хувь хүнээс худалдан авалт хийж үндэсний бизнес эрхлэгчид, нийлүүлэлтийн сүлжээг бодитоор дэмжсэн юм.

 

Сүүлийн таван жилийн хугацаанд 5 тэрбум гаруй төгрөгийг нийгмийн хариуцлагын хүрээнд боловсрол, эрүүл мэнд, байгаль орчин, хүүхэд хамгааллын чиглэлд зарцуулж, нийгмийн сайн сайхны төлөө тогтвортой хувь нэмэр оруулсаар байна.

Мобиком Групп нь НҮБ-ын Тогтвортой хөгжлийн зорилтуудтай уялдуулан чанартай боловсрол, эрүүл аюулгүй орчин, тэгш хүртээмжийг дэмжих нийгмийн хариуцлагын төслүүдийг тогтвортой хэрэгжүүлж, “Үдийн цай”, WASH, “Хүүхэд бүрд цэвэр ус”, “Боломжийг бүгдэд” зэрэг бодит санаачилгаар хүүхэд, залуус болон оюуны онцлогтой иргэдийн хөгжих боломжийг нэмэгдүүлсээр ирсэн.

Цаашид уламжлалт үүрэн холбооны үйлчилгээ үзүүлэгчээс технологид суурилсан цогц шийдэл санал болгодог TechCo компани болон хөгжиж, дижитал шилжилт, дата, хиймэл оюун ухаан, финтек, ухаалаг хэрэглэгчийн туршлагад суурилсан үйлчилгээг хүргэхийн зэрэгцээ эрчим хүчний хэрэглээг оновчлох, хүлэмжийн хийн ялгарлыг бууруулах, ногоон технологи нэвтрүүлэх замаар тогтвортой хөгжилд бодит хувь нэмэр оруулахаар хичээн ажиллаж байна.