Хигашиүэ Шиничи: Монголд зүрх судасны мэс заслын төв байгуулахаар тогтоод байна

Монгол, Японы дипломат харилцаа тогтоосны 50 жилийн ойд зориулсан “Их хуралдай” симпозиум өнөөдөр болж байна.

Энэ үеэр Монголд Зүрх судасны төв байгуулах талаар Токүшүкай группийн Ерөнхийлөгч Хигашиүэ Шиничи хэлсэн юм. 

Тэрбээр "Бид Монгол Улсын Ерөнхий сайдын урилгаар Монгол, Японы хооронд дипломат харилцаа тогтоосны 50 жилийн ойн хүрээнд айлчлан ирээд байна.

Манай багийнхан нийт дөрвөн эмнэлэгтэй танилцлаа. Тухайн эмнэлэгт тодорхой дэмжлэг үзүүлэхээр ирсэн бөгөөд одоогоор яг аль эмнэлэг вэ гэдгээ шийдээгүй байгаа. Зүрх судасны мэс заслын төвийг Монголд байгуулахаар тогтоод байна.

Зөвхөн барилга барьж, хүний нөөцийг хөгжүүлээд зогсохгүй тоног төхөөрөмж нийлүүлэхэд хувь нэмрээ оруулж, сургалт судалгааны ажилд туслах боломжтой. 

Миний хувьд Япон улсад хамгийн их зүрх судасны хагалгаа хийсэн эмч нарын нэг. Иймээс энэ салбар надад ойр. Түүнчлэн манай групп эмнэлгийн тухайд дотор болон зүрх судасны мэс засал хийдгээрээ их алдартай. Мөн дурангийн хагалгаагаар тэргүүлэх зэрэглэлийн эмнэлэг. Тиймээс хүмүүсээ сургах хүний нөөцийг бэлтгэх тал дээр бидэнд давуу тал болж байгаа.

Тухайн төвийг байгуулах хөрөнгө мөнгөний хувьд группийн Төлөөлөн Удирдах Зөвлөлийн хурлаар хэлэлцэж байж бодит дүнгээ хэлэх болно. Гэхдээ миний төсөөлж буйгаар 600 орчим сая иен байх болов уу" гэлээ.