Афганистаны өмнөх засгийн газарт ажиллаж байсан хүмүүсийг Талибанчууд ангуучилж эхэлжээ
Афганистанд хяналтаа тогтоогоод байгаа Исламын хатуу чиг шугам баримтлагч Талибан хөдөлгөөнийхөн өмнөх засгийн газарт болон NATO-гийн зэвсэгт хүчинд ажиллаж байсан иргэдийг мөрдөж эхэлсэн тухай НҮБ-ын тайланд өгүүлжээ.
Талибанчууд засгийн эрхэнд гарсныхаа дараа дайсных нь талд ажиллаж байсан хүмүүсээс өшөө авахгүй гэж амлаж байгаа. Гэхдээ Афганий иргэд тус зэвсэгт байгууллагыг 1990-ээд оноос хойш төдийлөн өөрчлөгдөөгүй хэмээн болгоомжилж байна.
НҮБ-ыг тагнуулын мэдээллээр хангадаг Норвегийн RHIPTO Global Analyses төвөөс гаргасан тайланд Талибанчууд өмнөх засагт ажиллаж байсан хүмүүсийн хаягаар очиж, гэр бүлийнхнийг нь сүрдүүлж байгаа тухай өгүүлжээ.
“Олон хүнийг Талибанчууд мөрдөн мөшгөж, сүрдүүлж байгаа нь нэгэнт тодорхой болсон. Хэрвээ өөрөө гарч ирэхгүй бол гэр бүлийнхнийг нь баривчилж, шийтгэхээр заналхийлж байна” гэж тус төвийн тэргүүн Кристиан Неллэман BBC сувагт ярьсан байна.
Өнгөрсөн хугацаанд Афганистаны хэд хэдэн хотод Талибаны дэглэмийг эсэргүүцсэн иргэдийн жагсаал зохион байгуулагдах үеэр энгийн хүмүүс алагдсан мэдээлэл ирж байгаа.
АНУ-ын цэргийн нисэх онгоц хөөрөх үеэр зүүгдээд газарт унаж амиа алдсан хүмүүсийн дотор Афганистаны хөлбөмбөгийн залуучуудын шигшээ багийн тамирчин, 19 настай Заки Анвари байсныг өчигдөр тодруулжээ.
Гадаад улс орнууд Афганистанаас иргэдээ нүүлгэсээр байна. Зөвхөн АНУ сүүлийн долоо хоног хүрэхгүй хугацаанд 7,000 хүнийг нүүлгэн шилжүүлжээ.
Кабулын олон улсын нисэх буудалд эмх замбараагүй байдал үргэлжилж, Талибанчууд иргэдийг нэвтрүүлэхгүйн тулд анхааруулах гал нээсэн тухай мэдээ ирж байна.
Талибан хөдөлгөөнийхөн АНУ-ын зэвсэгт хүчний ашиглаж байсан олон мянган хуягт машин, 30-40 нисэх онгоц, их хэмжээний буу зэвсгийг гартаа оруулсан талаар Пентагоны албаны эх сурвалж мэдээлжээ.
АНУ-ын ерөнхийлөгч Жо Байден саяхан хэвлэлд өгсөн ярилцлагадаа Талибанчууд өөрчлөгдсөн гэдэгт итгэхгүй байгаагаа илэрхийлээд тус байгууллага олон улсад "хүлээн зөвшөөрөгдөх үү, үгүй юу" гэдэг чухал сонголтын өмнө ирээд байгааг анхааруулжээ.
Эх сурвалж: BBC
