• 12 сарын 23, Даваа
|
Уншиж байна ...
Зураг
Зураг
ХУУЧИРСАН МЭДЭЭ: 2020/12/04-НД НИЙТЛЭГДСЭН

Дэлхий нийтээр дагаж мөрдөх дасгал хөдөлгөөний шинэ удирдамжийг ДЭМБ танилцууллаа

Б.Дэлгэр, iKon.mn
2020 оны 12 сарын 4
iKon.MN
Зураг зураг
Гэрэл зургийг MPA.mn
Дэлхийн хүн ам илүү идэвхтэй хөдөлгөөнтэй байсан бол жилд 5 сая нас баралтаас урьдчилан сэргийлэх боломжтой.

COVID-19 цар тахлын улмаас олон хүн гэртээ байгаа энэ үед Дэлхийн Эрүүл Мэндийн Байгууллага (ДЭМБ) дасгал хөдөлгөөн болон суугаа зан үйлийн талаар шинэ удирдамж гаргалаа. 2020 оны арваннэгдүгээр сарын 26-ны өдөр албан ёсоор гарсан энэхүү удирдамжид бүх насны хүн ам бие бялдрын байдлаас үл хамааран идэвхтэй байх боломжтой, хөдөлгөөн бүр чухал болохыг онцолжээ.

Шинэ удирдамж нь бүх насны хүн ам, түүний дотор архаг хууч өвчтэй, хөгжлийн бэрхшээлтэй хүмүүс, долоо хоногт багадаа 150-300 минут дунд зэргийн болон өндөр эрчимтэй дасгал хөдөлгөөн хийх, хүүхэд, өсвөр насныхан өдөрт дунджаар 60 минут дасгал хөдөлгөөн хийхийг зөвлөж байна.

Эмэгтэйчүүдийг жирэмсэн үед болон төрсний дараа дасгал хөдөлгөөн тогтмол хийхийг зөвлөжээ. Хөгжлийн бэрхшээлтэй хүмүүсийн хувьд дасгал хөдөлгөөн нь эрүүл мэндэд чухал ач тустай болохыг онцолсон байна. Ахмад настнуудын хувьд (65 ба түүнээс дээш настай хүмүүс) унахаас урьдчилан сэргийлэх, эрүүл мэндээ дэмжихэд тэнцвэр, булчингийн дасгал хийхийг зөвлөж байна.

 
Эх сурвалж: ДЭМБ
 
Эх сурвалж: ДЭМБ
 
Эх сурвалж: ДЭМБ

Биеийн тамирын дасгал хөдөлгөөнийг тогтмол хийх нь зүрх судасны өвчин, чихрийн шижингийн 2-р хэв шинж, хорт хавдраас урьдчилан сэргийлэх, сэтгэл санааны хямрал, айдас түгшүүрийн шинж тэмдгийг бууруулах, ой санамж муудах эрсдэлээс сэргийлэх, ой тогтоолтыг сайжруулах, тархины үйл ажиллагааг дэмжихэд чухал ач холбогдолтой.

ДЭМБ-ын Ерөнхий захирал Др Тедрос Адханом Гебрейесус "Хөдөлгөөнтэй байх нь эрүүл мэнд, сайн сайхан байдалд чухал үүрэг гүйцэтгэдэг. Хөдөлгөөн бүр чухал, ялангуяа коронавируст халдварын цар тахлын энэ үед бид бүгд аюулгүй, бүтээлчээр өдөр бүр хөдөлж байх хэрэгтэй” хэмээжээ.

Бүх төрлийн дасгал хөдөлгөөн нь эрүүл мэндэд ашиг тустай. Ажлын байранд, спорт зааланд, чөлөөт цагаараа эсвэл алхах, дугуй унах, гэрийн ажил хийх, бүжиглэх, тоглох, цэвэрлэгээ хийх зэргээр хаана ч, хэзээ ч идэвхтэй хөдөлгөөнтэй байж болно.

Дэлхийн улс орнууд Дасгал хөдөлгөөнийг дэмжих дэлхийн үйл ажиллагааны төлөвлөгөө (2018-2030)-ний хэрэгжилтийг эрчимжүүлэх, дасгал хөдөлгөөний үндэсний заавар, удирдамж боловсруулахдаа уг удирдамжийг хэрэглэхийг ДЭМБ-аас зөвлөж байна. Дасгал хөдөлгөөнийг дэмжих дэлхийн үйл ажиллагааны төлөвлөгөө (2018-2030)-г ДЭМБ-ын гишүүн улсуудын эрүүл мэндийн сайд нар 2018 онд болсон Дэлхийн эрүүл мэндийн 71-р чуулганы үеэр баталсан бөгөөд 2030 он гэхэд хөдөлгөөний идэвхгүй байдлыг 15%-аар бууруулах зорилт тавьсан юм.