Б.Жавхлан: Нүүрсний үнэ унаж байгаа нь таатай зүйл биш ч төсөв тодотгох хэмжээний цочрол үүсээгүй
Засгийн газрын өнөөдрийн хуралдаанд Сангийн Яамнаас 2025 оны эхний хоёр сарын төсвийн гүйцэтгэлийг танилцуулжээ.
Энэ оны эхний хоёр сарын байдлаар Монгол Улсын төсвийн орлого, зарлага хэвийн байгааг тус яамнаас онцлов.
Сангийн сайд Б.Жавхлан "Улсын төсвийн хоёрдугаар сарын төлөвлөгөө 4.2 их наяд төгрөгийн орлогоор биелсэн нь 95 хувийн гүйцэтгэлтэй байна гэсэн үг. Орлого хэвийн, төлөвлөгдсөн урсгал зардал, санхүүжилт, хөрөнгийн зардал хэвийн санхүүжилтээ авч байгаа.
Өмнөх оны мөн үетэй харьцуулахад бага зэрэг буурсан шалтгаан нь 2023 оны төсөв ашигтай гарч, жилийн эцсээр орж байсан орлогууд 2024 оны эхний сард давж бичигдэж байлаа. Ингэснээр 2024 оны эхний сард төсвийн орлого нэлээд өндөр гарсан.
Энэ жилийн хувьд төсвийн орлого орох ёстой потенциалынхаа хэмжээнд орж байна. Манай гол түүхий эд, ялангуяа нүүрсний үнэ унаж байгаа нь таатай зүйл биш. Эхний хоёр сарын гүйцэтгэлээр төсөвт цочрол үүсэх цохилт болоогүй.
Төсөвт тодотгол хийх нөхцөл үүсэх үү гэдэг асуултууд ирж байгаа. Гэхдээ Төсвийн тухай хуулийн 34.1.2. урьдчилан тооцох боломжгүй нөхцөл байдлын улмаас төсвийн орлого буурах, зарлага нэмэгдэж, нэгдсэн төсвийн алдагдал Дотоодын Нийт Бүтээгдэхүүн(ДНБ)-ий гурван хувиар нэмэгдэх тохиолдолд төсвийн тодотгол хийх нөхцөл үүснэ гэдэг.
Харин экспорт нэмэгдүүлэх, төсвийн орлогыг төлөвлөсөн хэмжээнд хүргэх талаар ажиллана. Богино хугацаанд экспортыг нэмэгдүүлэх, төв банкны валютын нөөцийг тогтвортой байлгах, нэмэгдүүлэхэд дэмжлэг үзүүлэх ажлыг хэсэг өнөөдөр байгуулагдлаа. Уг ажлын хэсгийг Сангийн сайд миний бие ахална" гэлээ.
"Алтны үнэ таатай байгаа энэ үеийг ашиглаж чадвал 700 сая ам.долларын нөөц бүрдүүлэх боломжтой"
Мөн тэрбээр оны эхний хоёр сарын байдлаар экспортын бие хэмжээний талаар "Экспортын биет хэмжээ хэвийн байгааг онцолъё. Эхний хоёр сард 10.5 сая тонн нүүрс гаргахаар төлөвлөж байсан бол одоогоор 11.5 сая тонн нүүрс гарсан. Биет хэмжээгээрээ төлөвлөж байснаасаа давсан.
254 мянган тонн зэсийн баяжмал гаргахаар төлөвлөж байсан бол 281 мянган тонныг гаргалаа.
Алтны тухайд манай улсад нөөц боломж их байгааг Сангийн сайд онцолж байв. Энэ жил 18 тонн алт төв банкны нөөцөд авна гэж тооцоолж байгаа аж. Өмнө нь хамгийн ихдээ 22 тонн алтыг төв банкны нөөцөд авчээ. Тэгвэл "Энэ жил төлөвлөж байснаасаа хоёр тонноор илүү буюу 20 тонн алтыг нөөцөд авч, алтны үнэ таатай байгааг боломжийг ашиглаж чадвал 700 гаруй сая ам.долларын нэмэлт нөөц бүрдүүлэх бүрэн боломжтой" хэмээн сайд Б.Жавхлан хэллээ.
Олон улсын худалдааны тарифууд өдөр бүр өөрчлөгдөж байгаа нь дотоодын эдийн засагт хэд хэдэн сувгаар нөлөөлж болзошгүй байгаа тул төрийн аль ч шатанд үнэ тарифыг нэмэгдүүлэх ямар ч шийдвэр гаргахгүй байхыг анхааруулсан Засгийн газрын тогтоол гарчээ. Энэ нь мөн Евроазийн Эдийн Засгийн Холбоотой байгуулах хэлэлцээ үргэлжилж байгаатай холбоотой юм байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
36 СЭТГЭГДЭЛТЭЙ
|
