БНСУ 2,797 нэр төрлийн бүтээгдэхүүнээ манай улсад 33%-ийн татварын хөнгөлөлттэйгөөр нийлүүлнэ
Дэлхийн хүн амын 40 орчим хувь буюу 2.9 тэрбум хэрэглэгч бүхий зах зээлд бараа, бүтээгдэхүүнээ нийлүүлэх боломжийг Ази, Номхон далайн худалдааны хэлэлцээр Монгол Улсад олгоод буй.
Тэгвэл энэхүү хэлэлцээрийн хүрээнд БНСУ Монгол Улсад 2,797 нэр төрлийн бүтээгдэхүүнд тавих татвараа дунджаар 33.4% бууруулах боломжтой болж байгааг тус улсын Сангийн сайд мэдэгдэв.
Монгол Улс өнгөрсөн хугацаанд БНСУ-тай хийсэн худалдаанаас өндөр алдагдал хүлээж ирсэн буюу экспортоосоо хэд дахин нугарсан бүтээгдэхүүнийг худалдаж авсаар ирсэн.
График. БНСУ-тай хийж буй Монгол Улсын худалдаа (2015-2016 ба 2017-2020 оны эхний 9 сар) сая ам.доллароор
Эх сурвалж: Гаалийн ерөнхий газар
2020 оны эхний есөн сард хийсэн худалдааг үзвэл манай улс
- БНСУ-д гянт болдын хүдэр, молибдены хүдрийн баяжмал, чулуун болон битумжсан нүүрс, үхэр, адууны боловсруулсан шир, мал амьтны самнаагүй хялгас, шевро болон ноолууран бүтээгдэхүүн экспортолсон бол
- Тус улсаас төрөл бүрийн загас, өтгөрүүлсэн сүү, жимс, цай, цагаан будаа, шар айраг, тамхи гэгчлэн 150 төрлийн бараа бүтээгдэхүүн импортолжээ.
БНСУ бол Монгол Улсын худалдааны тав дахь том түнш. Тус улсын эдийн засаг манай улсаас 1,000 илүү дахин том, ДНБ-ээрээ дэлхийд 11 дүгээрт бичигддэг. Нэг хүнд ногдох ДНБ 31,000 ам.доллар ба нийт худалдааны эргэлт нь 1.0 их наяд гаруй ам.доллароор хэмжигддэг том зах зээл юм.
АPTA нь 1975 онд байгуулагдсан бөгөөд БНСУ-аас гадна БНХАУ, Лаос, Бангладеш, Шри-Ланка, Энэтхэг улсуудыг эгнээндээ нэгтгэсэн.
Монгол Улс нь зөвхөн Япон улстай чөлөөт худалдааны хэлэлцээр хийсэн байдаг. Харин АПТА-д элсэн орсноор манай улс дээрх орнуудад хүнсний ногоо, жимс жимсгэнэ, эрдэс бүтээгдэхүүн, мод, химийн зэрэг 366 нэр төрлийн бараагаа татварын хөнгөлөлттэйгөөр нийлүүлэх боложмтой болж байна.
