94 жилийн түүхтэй англи үг үсэглэх тэмцээнд анх удаа найман аварга тодорчээ

АНУ-д 1925 оноос хойш жил бүр зохион байгуулагдаж байгаа “The Scripps National Spelling Bee” англи үг үсэглэх тэмцээний энэ оны шалгаруулалт өчигдөр буюу Баасан гарагт өндөрлөжээ.

Сонирхолтой нь энэ жил тэмцээний түүхэнд анх удаа найман оролцогч тэнцэж, нэгдүгээр байрыг хуваан эзэлсэн байна.

Ришик Гандхасри, Эрин Ховард, Сакет Сундар, Шрутхика Падхи, Сохум Сухатанкар, Абхижаи Кодали, Кристофер Серрао, Рожан Ража нар сүүлийн шатанд 47 үгийг бүгд алдалгүй үсэглэсэн тул зохион байгуулагчид нь шалгах үгийн нөөцгүй болжээ.

Уг тэмцээнд 1950, 1957, 1962, 2014, 2015, 2016 онуудад нийт зургаан удаа хоёр оролцогч тэргүүн байрыг хуваан эзэлж байсан бол хоёроос дээш тооны ялагч тодорсон түүх байхгүй юм.

Өчигдөр түрүүлсэн найман хүүхэд тус бүр тэргүүн байрын $50,000-ын шагналыг хүртжээ.

Тэмцээнд оролцогчид анагаах ухааны мэргэжлийн үг хэллэгээс эхлээд улс төрийн нэр томъёо хүртэл хамгийн хэцүү үгнүүдийг зөв үсэглэж өрсөлддөг.

Энэ жилийн найман аварга дараах үгнүүдийг сүүлчийн шатанд зөв үсэглэжээ. Үүнд: auslaut, erysipelas, bougainvillea, aiguillette, pendeloque, palama, cernuous, odylic.

Энэ жилийн тэмцээнд нийт 11 сая хүүхэд өрсөлдсөн байна. Тэмцээнд АНУ-ын бүх мух улсаас болон Бахамын арлууд, Канад, Гана, Ямайка, Япон, Өмнөд Солонгос гэсэн зургаан улсаас хүүхдүүд оролцжээ.

Эх сурвалж: The Guardian