116 дугаар сургуулийнхан дөрвөн төрлийн брайл газрын зурагтай боллоо
Барилга, хот байгуулалтын яам болон Газар зохион байгуулалт, геодези, зураг зүйн газраас дөрвөн төрлийн брайл газрын зургийг Нийслэлийн ерөнхий боловсролын 116 дугаар тусгай дунд сургуульд өнөөдөр хүлээлгэн өглөө.
Уг газрын зургийг 2018 онд зохион, хэвлүүлээд тус сургуулийн сурагчдын газар зүйн хичээлийн сургалтын хэрэгцээнд зориулан тус бүр 150 ширхгийг өгч байгаа юм.
Дөрвөн төрлийн брайл газрын зурагт:
- Дэлхийн газрын зураг
- Монгол орны засаг, захиргааны зураг
- 116 дугаар сургууль орчмын тойм зураг
- 116 дугаар сургуулийн хашаан доторх тойм зураг багтжээ.
Эдгээр брайл газрын зургаар дамжуулан сургуулийн ойр орчмын газар орны байдал, өөрийн улсын болон аймгуудын байршил, хэлбэр, хэмжээ, дэлхийн улс орнууд, тив, далай тэнгис хаана байрлаж байгааг мэдэж авч, газар зүйн мэдлэгээ нэмэгдүүлнэ.
Харааны бэрхшээлтэй сурагчид "116-р сургууль орчмын брайл газрын зураг”-ийг ашиглан автобусны буудлаас сургууль хүртлээ ирж, сургуулийн хашаан доторх брайл газрын зураг ашиглан сургуулийн хашаан дотор ганцаараа ч явах боломжтой боллоо.
Цаашид аймаг, сум, Улаанбаатар хоттой илүү их ойр танилцах боломж олгохоор БХБЯ, ГЗБГЗЗГ-аас “Харааны бэрхшээлтэй иргэдэд зориулсан Монгол орны атлас” зохиож, хэвлүүлэхээр 2019 онд төлөвлөжээ.
Эх сурвалж: БХБЯ
