Замын-Үүдэд осолд орсон хүмүүсийн 20 нь хүнд гэмтсэн эмчлүүлж байна, гурвыг нь нисдэг тэргээр авчирна
Энэ сарын 8-нд Улаанбаатараас Замын-Үүд чиглэлд 47 хүнтэй нийтийн тээврийн автобус, сумаас 10 км зайтай орох хаалга мөргөж, зам тээврийн осол -гарсан. Ослын улмаас хоёр хүн газар дээрээ амиа алдаж, 45 хүн хүнд болон хөнгөн гэмтэж бэртсэн. Осолд орсон иргэдэд орон нутгийн эмнэлгээс анхан шатны тусламж үзүүлэн Замын-Үүд сумын эмнэлэг рүү зөөвөрлөн хүргэж, бүх хүнд ЭХО, рентген оношилгоог хийлээ.
Өчигдөр орой /2019.01.09/ 37 өвчтөнийг эмч нарын хамт Замын-Үүдээс галт тэргээр Улаанбаатарт авч ирсэн.
Өнөөдөр өглөө ирсэн өвчтөнүүдийг ГССҮТ, Нийслэлийн түргэн тусламжийн төвийн машинууд ГССҮТ-д хүргэж эмнэлгийн тусламж үйлчилгээ үзүүлж байна.
Эмчилгээний тасагт хэвтсэн 20 хүн хүнд гэмтсэн, тархи нугасны гэмтэлтэй, мөчдийн хугарал ихтэй. Харин 4 өвчтөн оношилгооны түвшинд байгаа бол бусад нь харьцангуй гэмтэл багатай, эмчийн хяналтанд орж, зөвлөгөө аваад буцлаа.
Замын-Үүд суманд байгаа гурван өвчтөнийг авахаар Гэмтэл, согог судлалын үндэсний төвөөс гавал тархины гэмтлийн эмч, эрчимт эмчилгээний эмч болон сувилагч нисдэг тэргээр орон нутгийг зорьсон. Өнөөдөр 17:00 цагт Улаанбаатарт газардах юм гэж ЭМЯ-наас мэдээллээ.
