Оросоос авсан С-400 системээ Хятадын арми анх удаа туршсан нь амжилттай болжээ

ОХУ-аас худалдаж авсан хамгийн орчин үеийн агаараас хамгаалах С-400 системийг Хятадын Ардын Чөлөөлөх Арми амжилттай туршсан болохыг Оросын хэвлэлүүд мэдээлжээ.

Тодруулбал С-400 Триумф агаараас хамгаалах системийг өнгөрсөн сард туршихдаа 250 км-ийн алсад секундэд 3 км хурдтай яваа баллистик пуужин орлуулагч байг устгаж чадсан байна.

2015 онд хоёр улс С-400 системийг нийлүүлэх $3 тэрбумын дүнтэй гэрээ байгуулж, өнгөрсөн долдугаар сард Хятадад хүргэж, суурилуулсан юм. Тэр цагаас хойш анх удаа туршсан нь энэ ажээ.

Хятадын армид өмнөх С-300 загварын хамгаалах систем арав гаруй жил ашиглагдаж байгаа. Харин дараа үеийн С-400 загварыг худалдаж авсан анхны улс нь Хятад болж байв.

Өнгөрсөн аравдугаар сард Делид хийсэн Владимир Путины айлчлалын үеэр Энэтхэг улс мөн С-400 системийг худалдан авах $5 тэрбумын гэрээ байгуулсан юм. С-400 агаараас хамгаалах систем нь 600 хүртэл километрийн зайд 10 метрээс 27 км-ын өндөрт яваа баллистик пуужин, нисэх онгоц, дронуудыг устгах чадвартай юм.

Мөн тус бүр 4,800 метр/секунд хүртэл хурдтайгаар хөдөлж буй 36 ширхэг байг 72 ширхэг газар-агаар ангиллын пуужингаар нэг зэрэг устгах чадвартай систем ажээ. Туршилтын тухай мэдээллийг Хятадын талаас биш, ОХУ-ын хэвлэл эхлэн тараасан нь хоёр орны батлан хамгаалах салбарын хамтын ажиллагаа ямар түвшинд хүрснийг Вашингтонд харуулах зорилготой гэж мэргэжилтнүүд дүгнэж байна.

Эх сурвалж: South China Morning Post