"16 жилийн дараа С.Зоригийг зэрлэгээр хөнөөсөн хэрэгт намайг дахин яллагдагчаар татлаа"

Гэрэл зургийг mpa.mn

Нийслэлийн Ардчилсан Намын дарга Э.Бат-Үүл өнөөдөр хэвлэлийн бага хурал хийн, мэдэгдэл хийлээ.

Тэрбээр "Би та бүхэнд хандаж хэвлэлийн бага хурал хийхдээ цаг үеийн асуудлаар ярина гэсэн мэдээлэл  тараасан. Гэхдээ өнөөдөр үнэндээ цаг үеийн асуудлаар биш намайг олон жилийн дараа С.Зоригийг зэрлэгээр хөнөөсөн хэрэгт яллагдагчаар татаж, хууль зөрчиж дахин тус хэрэгт холбогдуулах хэрэг эрч хүчээ авч байгаа учраас мэдээлэл хийж байна.

Намайг хууль зөрчиж хорих хүртэл зүйлийг шаардаж байгаа талаар мэдээлэл авсан. Тэгэхээр ямар ч байсан та бүхэнд мэдээлэл өгье гэж шийдсэн юм.

2000 онд намайг хуулийн наад захын шаардлага, заалтуудыг зөрчиж Ганц худагт аваачиж хорьж байсан. Би тэр үед юу ч мэдээгүй байсан учраас олон түмэндээ  мэдээлэл, үгээ хэлж чадалгүй баригдаад явж байсан. Ахиад ийм үйл явдал болж магадгүй байна.

1998 оны намар С.Зоригийг зэрлэгээр хөнөөсөн үйл явдал болсон орой намайг гэртээ байхад тэр үеийн Нийслэлийн цагдаагийн газрын дарга Н.Ганболд ирсэн. Намайг хамгаалалтад авч байна гэж хэлээд хэрэг болсон газарт дагуулж очсон. Хэргийн газарт очиход үнэхээр олон хүн бужигнаж байсан. Хэргийн газрыг хамгаалалтад аваагүй бөөн бужигнаан болж байлаа. Мэдээж хэрэг би хэргийн газарт очоод цочирдсон. Тэнд Ц.Элбэгдоржтой таараад хамт гараад явсан. Гарахдаа малгайгаа мартаад гарсан байсан. Цагаан цэнхэр өнгөтэй хадам ээжийн маань өмсдөг байсан малгайг би тэнд мартсан. Хэргийн дараа надаас гэрчийн мэдүүлэг аваад, малгайг мартсан байсан гэж тогтоогоод надад буцааж өгсөн. Ахиж надаас ямар нэгэн байцаалт мэдүүлэг аваагүй.

Гэтэл 2000 оны УИХ сонгуулийн өмнө дөрөвдүгээр сард намайг дахин дуудаж, малгайг нэхсэн. Малгайг авчирч өг гэсэн. Аваачаад өгтөл "Энэ малгай хэргийн газраас олдсон учраас сэжигтнээр татаж байна" гэсэн. Ингээд тэр хэрэгт холбогдуулсан улс төрийн компанит ажил явуулан, МАН яг энэ жилийнх шиг үнэмлэхүй ялалт байгуулсан.

Д.Дожоодорж гэдэг хүн яг сонгуулийн өмнө "Ардчилсан хувьсгалын удирдагчийг хэн хөнөөсөн бэ" гэдэг ном гаргаж, намайг маш их гүтгэн гүжирдэж бичсэн. Энэ номоо миний нэр дэвшсэн тойрогт маш олон тоогоор хэвлэж тараасан.

 

Энэ хэргийг гарсны дараа улстөржүүлж болохгүй ээ гэдэг зүйлийг би хамгийн их ярьж байсан.

2000 оны наймдугаар сард намайг огт хийгээгүй хэрэгт буруутгаж хорисон. Би хүнд гар ч хүрээгүй байхад хүн зодсон гэж буруутгасан. Дараа тэр хэргийг прокурор хүчингүй болгосон. Тэгтэл энэ хүнийг яллагдагчаар татаж байна гээд хорих үйл ажиллагаагаа үргэлжлүүлсэн. Хууль бусаар намайг хорьж байсныг прокурор тогтоогоод шоронгоос суллагдаж байлаа.

Би тухайн үед С.Оюунд хэлж байсан гаднаас өндөр зэрэглэлийн мөрдөгч авч ирэх хэрэгтэй. Гэмт хэрэг болсон газрыг хамгаалалтад авахгүй байгаа хүмүүс яаж хэргийг илрүүлэх юм бэ.

Гэтэл сая сонгуулийн өмнө дахиад энэ хэргийг сөхлөө. "Ц.Элбэгдорж ямар хүнд улсын баатар өгчихөв өө гэж дороо дэвхцан хашхирлаа", "17 жил бугшсан С.Зоригийн аллага илэрлээ" гэх мэт мэдээллүүд сонин, вэб сайтуудаар гарсан. Ингэхдээ намайг алсан биш, алж байхад нь хажууд нь байсан гэж бичсэн байгаа юм. Үүнийг шалгуулахаар Прокурорт хандсан боловч шалгаж өгөхгүй байгаа. Хүний амь нас хөнөөсөн онц ноцтой гэмт хэрэгт холбогдуулан намайг гүжирдсэн.

Гэтэл одоо 16 жилийн дараа хууль бусаар С.Зоригийг зэрлэгээр хөнөөсөн, бүрэлгэсэн хэрэгт дахин намайг яллагдагчаар татлаа. Би яллагдагчаар мэдүүлэг өгөхгүй. Би өөрийгөө өмгөөлөх, мэдүүлэг өгөхгүй байх эрхтэй.

 

Энэ хэргээс болж хамгийн их гүтгэгдэж, хохирч байгаа хүн бол би. Тийм болохоор он жил улирах тутам би буруутан олдоосой гэж улам их хүсэх болсон. Буруутай хүн олдоосой гэж би өдөр бүр залбирдаг.

Өнгөрсөн тав дахь өдөр энэ хэрэг болсоноос хойш анх удаа надаас хурууны хээ, цусны шинжилгээг авсан. Харьцуулсан шинжилгээ хийнэ гэсэн. Яллагдагчаар татна гэдэг чинь тодорхой нотлох баримттай байж байж татдаг. Гэтэл яллагдагчаар татсан хойноо нотлох баримт хайгаад байна. Намайг яллагдагчаар татаж байгаа бол хуулийн дагуу л хий. Би дуудсан цагт нь очдог. Эрүүгийн хууль болон Эрүүгийн байцаан шийтгэх хуулийн дагуу л ажлаа явуул.

Сонгуультай холбогдуулж л намайг ингэж гүтгэн гүжирддэг. Одоо Ерөнхийлөгчийн сонгуультай холбогдуулан намайг гүтгэх ажлаа эхлүүллээ." гэв.

Дээрх мэдээллийг хийсний дараа Нийслэлийн Ардчилсан Намын дарга Э.Бат-Үүл сэтгүүлчдийн асуултад хариуллаа.

- Ерөнхийлөгчийн сонгуультай холбогдуулан таныг гүтгэж байна гэлээ. Та Ерөнхийлөгчийн сонгуульд өрсөлдөх үү?

- Намайг Ерөнхийлөгчийн сонгуульд өрсөлдөөч ээ гэсэн санал хүсэлтийг намын гишүүдээс, олон түмний зүгээс ч тавьдаг.

- Хаанаас яллагдагчаар татсан бэ?

- Тагнуулын байгууллагаас.

- Таныг АН-ын даргад өрсөлдөнө гэсэн мэдээлэл байгаа. Энэ тухайд?

- Нэгэнд З.Энхболд дарга ажлаа өгчихсөн энэ үед ҮЗХ-н дээр томилогдох намын дарга нь намынхаа шинэчлэлийг хийгээд Их хурлаар намын даргад өрсөлдөхгүй гэсэн зарчимтай. ҮЗХ-оос гарсан дарга Их хурлаар өөрийгөө батламжлуулах гээд очвол  намын шинэчлэл хийгдэхгүй.

Намайг шинэчлэл хийгээд ажлаа өг гэвэл асуудалгүй би хийнэ. Би хэзээ ч албан тушаалын төлөө явж байгаагүй. Та нар мэднэ. Албан тушаал бол ажлаа хийх хэрэгсэл. Түүнээс биш өөрийгөө гоёдог хэрэгсэл биш.