Үндсэн хуулиа баталж, БНМАУ-ыг тунхагласан өдрийн баярын мэнд хүргэлээ
УИХ-ын нэгдсэн чуулганы өнөөдрийн хуралдааны эхэнд УИХ-ын дарга З.Энхболд Анхны Үндсэн хуулиа баталж, БНМАУ-ыг тунхагласан өдрийн баярын мэндийг хүргэлээ.
Тэрбээр хэлсэн үгэндээ “Монголчууд анхдугаар Үндсэн хуулиа баталж, Бүгд найрамдах тогтолцоонд шилжсэний 91 жилийн ой тохиож байна. Энэ түүхт баярын өдрийг тохиолдуулан Монгол Улсын Их Хурлын нэрийн өмнөөс болон хувиасаа Монгол түмэндээ баярын мэнд хүргэе.
Анхдугаар Үндсэн хуулийн дагуу Улсын анхдугаар хурлаас Улсын бага хурлыг 30 гишүүнтэй сонгож байгуулсан нь өнөөдрийн парламентын үндэс болсон гэж үздэг юм. Энэ үед Улсын бага хурал байнгын ажиллагаатай парламент шиг байгаагүй ч Ардын Их Хурлын чөлөөт цагт төрийн эрхийг барих хууль тогтоох, улс орны хөгжлийн асуудлыг шийдэх ард олны төлөөллийн байгууллага болж байсан билээ.
Эрхэм гишүүд болон Монголын ард түмэнд дахин баярын мэнд хүргэе" гэлээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
