Оюу толгой компани Өмнөговь аймагт жил бүр 5 сая доллар шилжүүлэх гэрээ байгууллаа

Өмнөговь аймаг, Ханбогд сум болон Оюу толгой ХХК-ийн хоорондын хамтын ажиллагааны гэрээ байгуулах ёслол тус аймгийн төв Даланзадгад хотод боллоо.

Хамтын ажиллагааны гэрээнд Оюу толгой компанийг төлөөлж тус компанийн Ерөнхийлөгч бөгөөд гүйцэтгэх захирал Эндрью Вүдлей, Өмнөговь аймгийн Засаг дарга Б.Бадраа, ИХ-ын дарга Т.Батчулуун, Ханбогд сумын Засаг дарга Т.Баян-Өлзий ИХ-ын дарга Х.Нэхийт нар гарын үсэг зурлаа. 

Хамтран ажиллах гэрээний хүрээнд дараах чиглэлүүдээр үйл ажиллагаа явагдах аж. 

Үүнд:

• Усны менежмент
   
• Байгаль орчныг хамгаалах менежмент
   
• Уламжлалт мал аж ахуй, бэлчээрийн менежмент
   
• Үндэсний түүх соёл ба аялал жуулчлал
   
• Нийгмийн суурь үйлчилгээ 
   
• Орон нутгийн хөгжлийг дэмжих үйл ажиллагаанууд 
   
• Нийтийн зориулалттай дэд бүтэц буюу хот байгуулахад шаардлагатай инженерийн шугам сүлжээний ажлууд хийгдэх юм. 

“Хөгжлийг дэмжих сан”-г шинээр байгуулан дээрх ажлуудыг санхүүжүүлэх юм байна. Уг санд Оюу толгой компаниас жил бүр таван сая доллар шилжүүлж байх аж. 

Энэхүү хамтын ажиллагааны гэрээг 30 жилийн хугацаатай, цаашид сунгах нөхцөлтэйгөөр байгуулжээ.