Сургууль, цэцэрлэгийн хоол хүнсний аюулгүй байдлыг хангах зөвлөмж

2014 оны шинэ хичээлийн жил гараад Өмнөговь аймгийн Ханбогд сумын хүүхдийн цэцэрлэг, Баян-өлгий аймгийн Өлгий хотын ерөнхий боловсролын дунд сургуулийн дотуур байранд  хоол хүнстэй холбоотой халдвар хордлого гарч олон хүүхдийг хамран өвчлүүлж,  хоол хүнсний аюулгүй байдал, хоол хүнсийг боловсруулж буй газруудын эрүүл ахуй, ариун цэврийн дэглэм, ажиллагсдын ажлын хариуцлагатай холбоотой зөрчлүүд гарч байна. 

Иймээс цаашид сургууль хүүхдийн байгууллагад дахин давтан хордлого халдвар гарч олон хүүхдийг өвчлүүлэхээс сэрэмжлүүлж, дараах зөвлөмжийг хүүхдийн байгууллага бүрт хэрэгжүүлж ажиллуулахыг ХӨСҮТ-өөс зөвлөж  байна. Үүнд:

• Хүүхдийн байгууллагад ажиллагсдыг  эрүүл мэндийн урьдчилан сэргийлэх үзлэг шинжилгээнд нэг бүрчлэн оруулах, хувийн ариун цэврийг чанд сахиулж, хоол үйлдвэрлэлийн технологи үйл ажиллагаанд сургах.
   
• Ажилчдын дунд сургалт сурталчилгааг мэргэжлийн байгууллагын хүмүүсийг оролцуулан тогтмол зохион байгуулах
   
• Хүүхдийн байгууллагууд нь зориулалтын барилга байгууламжтай, гал тогооны газрын агуулах, өрөө тасалгаа нь түүхийгээс болсон бүтээгдэхүүн рүү чиглэсэн нэг урсгал дамжлагатай, дотоод тоног төхөөрөмж, хоол бэлтгэх технологи нь нийтийн хоолны газрын ариун цэврийн дүрмийн шаардлагыг хангасан байх.
   
• Хоол боловсруулах, үйлдвэрлэх, үйлдвэрийн технологи урсгал, түүхий эдийг хүлээж авахаас эхлээд үйлдвэрлэх, боловсруулах үед дотоодын хяналтыг тавьж, бохирдолтын эх сурвалж байгаа эсэх, бэлэн бүтээгдэхүүний хадгалалт тээвэрлэлтийн нөхцөл байдлын талаар тогтмол тэмдэглэл хөтлөх.
   
• Хүнсний бүтээгдэхүүнийг баталгаа, шинжилгээтэй найдвартай газраас худалдан авах, гэрээ хэлцэл хийх, бүтээгдэхүүнийг хадгалах хөргөгч, хөргүүртэй, түүнд зөв хадгалах, болсон түүхий бүтээгдэхүүнийг хамт нэг дор хадгалахгүй байх.
   
• Өдөр бүр хийх хоолны цэсийг захирал  эрхлэгч нараар батлуулж, цэсэнд бичигдсэн хоол тус бүрийг  батлагдсан жор технологийн дагуу бэлтгэж, хоол бүрээс дээж авч бэлтгэсэн он, сар, өдөр цаг минутыг бичиж хоол үйлдвэрлэсэн тогоочийн нэрийг бүртгэн, +4-+6 хэмтэй хөргөгчинд 72  цаг хадгална.
   
• Хүнсний хог хаягдлыг тогтмол хугацаанд зайлуулах, хортон шавьж мэрэгчтэй тэмцэх журмыг баримталж ажиллах, ариутгал халдваргүйтгэлийг хийлгэж хэвших, хэрэглэж байгаа ариутгалын бодисын чанарыг мэргэжлийн байгууллагаар шалгуулж дүгнэлт гаргуулж хэрэглэхийг зөвлөж байна.