А.Батцэцэг залуучуудын дэлхийн аварга боллоо

2014 оны чөлөөт бөхийн залуучуудын дэлхийн аварга шалгаруулах тэм­цээн  Хорват улсын Загреб хо­тын “Dow Sportova” спортын ор­донд дөрвөн өдөр үргэлжилж, өчигдөр өндөрлөлөө.

Тэгвэл өн­гөрсөн бямба гарагт  эмэг­тэй чөлөөт бөхийн 48, 55, 63, 72 кг-ын жингүүдийн барил­даан болж манай дөрвөн бөх зодоглосноос 55 кг-ын жинд ба­рилдсан А.Батцэцэг га­рам­гай сайн барилдаж бүх өр­сөлдөгчдөө илүүрхэн ялж за­луучуудын дэлхийн аварга гэ­дэг хүндтэй цолыг хүртлээ. 

Тий­мээс түүнийг “Монголын мэ­дээ” сонин өнгөрч буй до­лоо хоногийн дуулиант нөхрөөр нэрлэж байгаа юм. Тэр­бээр манай улсаас дэлхийн за­луу­чуудын аварга гэдэг цо­лыг хүртсэн Монголын до­лоо дахь, бүсгүйчүүдийн хувьд гу­рав дахь бөх болов. Тэр­бээр  Азийн өсвөрийн болон за­луу­чуудын аварга, дэлхийн за­луучуудын аварга цолыг дараа­лан хүртэж, гайхалтай амжилт гаргаад байгаа юм. А.Батцэцэг нь “Хасу-Мегастарс” клубын та­мир­чин бөгөөд дас­галжуулагч Ц.Баяр­сайханы шавь нараас төрсөн хоёр дахь дэлхийн залуучуудын аварга бөх болж байна. Өмнө нь 2007 онд олон улсын хэмжээний мастер Т.Даваахуяг БНХАУ-ын Бээжин хотод дэлхийн залуучуудын аварга болж бай­сан юм.  

Эмэгтэйчүүдийн 55 кг-ын жинд 20 бөх барилдсанаас А.Батцэцэг нэгдүгээр тойрогт хийлж,  хоёрдугаар тойрогт Хятадын бөх Хьюжинг Вангийг, гуравдугаар тойрогт Германы бөх Женни Сенжерийг цэвэр ялсан байна. Улмаар  мөнгөн медалийн төлөө барилдаанд Японы бөх Нанами Ириег 8:3-аар ялж,  алтан медалийн тө­лөө Украиний бөх Татьяна Кит­тэй өрсөлдөж 10:0-ээр илт илүүрхсэнээр аварга болжээ.  Залуучуудын дэлхийн аварга А.Батцэцэг  1994 онд Дархан-Уул аймагт төрсөн. Нийслэлийн Баян­­гол дүүргийн 47 дугаар дунд сургуулийг 2012 онд төг­сөөд ҮБТДС-д элсэн одоо гурав­ду­гаар дамжаанд суралцаж бай­гаа аж. 

Тэрбээр  2007 онд “Хасу-Мегаватт” клубт орж дас­галжуулагч Ц.Баярсайханы удирдлага дор чөлөөт бөхийн спортоор хичээллэж эхэлжээ. Улмаар 2010 он спортын мас­тер, 2014 онд олон улсын хэм­жээ­ний мастер цол хүртсэн аж. А.Батцэцэг хүүхдийн спор­­тын наадмаас алт, өсвөр үеийн УАШТ-нээс хүрэл, залуу­чуу­дын УАШТ-нээс хүрэл, хо­­шой алт, мөнгө, насанд хү­рэгч­­дийн УАШТ-нээс алтан ме­даль хүртээд байгаа шилдэг та­мир­чин юм. 

 А.Батцэцэг хүүхдийн спор­­тын наадмаас алт, өсвөр үеийн УАШТ-нээс хүрэл, залуу­чуу­дын УАШТ-нээс хүрэл, хо­­шой алт, мөнгө, насанд хү­рэгч­­дийн УАШТ-нээс алтан ме­даль хүртээд байгаа

Мөн 2009 онд Улаан­баатар хотод болсон Олон улсын хүүхдийн спортын мон­гол туургатны наадмаас алт, 2011 онд Азийн өсвөр үеийн авар­га шалгаруулах тэмцээнээс 2011 онд Тайланд улсын Бангкок хотод алт, өсвөрийн ДАШТ-нээс Унгар улсын Зом­баттелли хотод мөнгө, Азийн залуучуудын аварга шал­га­руулах тэмцээнээс 2013 онд Тай­­ланд улсын Пукет хотод хү­рэл, 2014 онд Улаанбаатар хотод алт, 2014 онд Хорват улсын Загреб хотод болсон залуучуудын ДАШТ-нээс алтан медаль хүртжээ. Түүнээс гадна “Mongolia Open” олон улсын тэмцээнээс 2013-2014 онуудад хошой мөнгө, 2014 онд ОХУ-ын Красноярск хотод болдог Миндиашвилийн нэрэмжит олон улсын тэмцээнээс алт, И.Ярыгиний нэрэмжит “Ал­тан Гран-При” олон улсын тэм­цээнээс хүрэл медаль хүртээд байна. 

А.Батцэцэг бол сүүлийн жилүүдэд Монголын чөлөөт бөхийн ертөнцөд гарч ирээд бай­гаа гурав дахь Батцэцэг нэр­тэй бөх юм. Монгол Улсын гавьяат тамирчин С.Батцэцэг дэл­хийн аварга цол хүртэж, Лон­доны олимпийн наадмаас хү­рэл медаль хүртсэн. Тэг­вэл Налайхын “баавгай” хо­чит Б.Батцэцэг 2010 онд хүүх­дийн анхдугаар олимпийн наад­маас алтан медаль хүртэж бай­сан түүх­тэй. Харин энэ удаад А.Бат­цэ­цэг залуучуудын дэл­хийн авар­га болж, ирээдүйн зал­гамж ха­лаа ямар хэмжээнд бэлт­гэгдэж байгааг баталлаа.