Facebook компани WhatsApp мессэнжэрийг 19$ тэрбумаар авлаа

 Facebook компани мессэнжэрийн WhatsApp үйлчилгээг 19 тэрбум доллараар авах болсноо зарлалаа.

WhatsApp нь сурталчилгаа байрлуулдаггүй, бүх ухаалаг гар утсанд үнэгүй суудаг, харин хэрэглэгч жилд 0.99 доллар төлдөг бизнес загвараар ажилладаг юм. Сүүлийн үед ийм мессэнжэр үйлчилгээнүүд Facebook, Twitter зэрэг нийгмийн сүлжээний үйлчилгээнүүдийг айлгах болсон билээ. Тухайлбал WhatsApp-аас гадна Японд Line, Солонгост Kakao talk, Хятадад WeChat зэрэг үйлчилгээнүүд хүчээ авч зарим талаар Facebook, Twitter-ээс илүү гараад байгаа юм.

Тиймээс Facebook-ын энэ алхам стратегийн хувьд ихээхэн зөв шийдвэр болсон гэдэгт итгэлтэй байна. Цаашдаа WhatsApp нь огт өөрчлөгдөхгүй, бие даасан хэвээр үйл ажиллагаагаа явуулах гэнэ. Харин үүсгэн байгуулагч Жан Коум нь Facebook-ын ТУЗ-д гишүүнээр суух юм байна. Тэр урьд нь Yahoo компанид ажиллаж байсан юм.

Ингээд WhatsApp-ын зарим статистик үзүүлэлтүүдтэй танилцая.

• Сар бүр 450 сая гаруй хэрэглэгч нэвтэрдэг
• Эдгээрээс 70% нь өдөр тутам идэвхтэй хэрэглэдэг
• Явдаг мессэжийн тоо нь дэлхийн мобайл операторуудаар явдаг SMS-ын тоонд хүрсэн
• Одоогоор өдөрт 1 сая шинэ хэрэглэгч нэмэгддэг
• 50 гаруй ажилтантайн ихэнх нь инженерүүд
• Гол технологи хөгжүүлэлт нь Орост хийгддэг. Учир нь хүн хүчний зардал бага байдгаас.

Энэ наймаа нь Технологийн ертөнц дэхь хамгийн том дүнтэй худалдан авалтуудын нэгт тооцогдож байна.