Нийслэл хотын хориглосон бүсэд малаа оруулсан 28 иргэнийг торгожээ

Энэ сарын нэгнээс нийслэл хотын хориглосон бүсэд оруулсан малыг гаргах ажлыг зохион байгуулжээ.

Төрийн байгууллага, дүүрэг, хороодын 767 албан хаагч, 173 машин техниктэйгээр төвийн зургаан дүүргийн бүс нутагт самналт хийж хориглосон бүсээс 1,160 адуу, 33 үхэр илрүүлж, 748 адууг хашаалсан байна. Хориглосон бүсэд малаа оруулсан 28 иргэнийг торгожээ.

Тэдэнд Зөрчлийн тухай хуулийн 6.30.3-т заасны дагуу нийт 28 сая төгрөгийн торгууль ногдуулсан байна.

Улаанбаатар хотод мал аж ахуй эрхлэхийг хориглосон бүсүүд:

• Чингэлтэй
• Сүхбаатар
• Баянгол дүүргийн нутаг дэвсгэр бүхэлдээ
• Баянзүрх, Сонгинохайрхан, Хан-Уул дүүргийн Гачуурт, Хонхор, Эмээлт, Жаргалант, Туул тосгон, Өлзийт хорооноос бусад бүх хорооны нутаг дэвсгэр
• Алслагдсан гурван дүүргийн суурьшлын бүс
• Богд уул орчимд гэж НИТХ-аас тогтоожээ.

Хориглосон бүсэд мал бэлчээх нь хотын эко систем, ногоон байгууламжийг сүйтгээд зогсохгүй мал, амьтны гоц халдварт өвчин үүсгэх, олон нийтийг хамарсан өвчлөл тараах эрсдэлийг бий болгодог байна.