Баянхонгор аймгийн нутгийн зөвлөлөөс шинэ арслан Э.Батмагнайд "Lexus 600" загварын автомашин бэлэглэнэ
Энэ жилийн баяр наадмын бөхийн барилдаанд ес давж, улсын арслан цол хүртсэн Баянхонгор аймгийн Жинст сумын харьяат, "Алдар" спорт хороо, "Тэргүүн Богд" дэвжээний бөх Энхтүвшингийн Батмагнайд Баянхонгор аймгийн Улаанбаатар хот дахь Нутгийн зөвлөлөөс нь "Lexus 600" загварын автомашинаар шагнахаа мэдэгджээ.
Түүнчлэн төрийн наадамд үзүүлсэн амжилтыг нь үнэлж, М-Си-Эс групп нэг тэрбумаар мялааж байгааг тус группийн Захирлуудын зөвлөлийн дарга Ж.Оджаргал өчигдөр цахим хуудсаараа дамжуулан мэдэгдсэн юм.
Сонирхуулахад Э.Батмагнай энэ жилийн баяр наадмын долоогийн даваанд улсын заан Ө.Бат-Өлзийтэй тунаж барилдаж заан болсноор "ЗААН ЖИМНИ" буюу Suzuki Jimny загварын автомашины эзэн болсон билээ.
"Бридж Моторс" компанийн хамт олон Монголын Үндэсний Бөхийн Холбоо (МҮБХ)-той хамтран сүүлийн таван жил долоогийн даваанд тунаж, заан болсон бөхчүүдийг автомашинаар байлж буй юм.
Хамгийн анх уг шагналыг М.Бадарч 2020 онд хүртэж байсан бол 2022 онд М.Лхагвагэрэл, 2023 онд Ц.Бямба-Отгон нар авч байв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
