"The MongolZ" багийн ДАШТ-ий шөвгийн наймын тоглолт энэ долоо хоногийн Бямба гарагийн өглөө эхэлнэ
Counter Strike-2 (CS2) тоглоомын энэ оны эхний Дэлхийн Аварга Шалгаруулах Тэмцээн (ДАШТ) буюу "BLAST.tv Austin Major 2025" АНУ-ын Остин хотноо Playoffs шатны тоглолтуудаар үргэлжлэх гэж байна.
Тус тэмцээний Playoffs шатанд ОХУ-ын Team Spirit, Данийн MOUZ, Францын Team Vitality, Украины Natus Vincere, Европын FaZe Clan, Манай улсын The MongolZ, Бразилын paiN Gaming болон FURIA гэсэн найман баг шалгарсан билээ.
Шөвгийн найман багийн өрсөлдөөн маргааш шөнө 03:00 цагт ОХУ-ын Team Spirit болон Данийн MOUZ багийн тоглолтоор эхэлнэ. Харин манай улсын The MongolZ баг Европын "FaZe Clan"-тай учраа таарсан бөгөөд энэ долоо хоногийн Бямба гарагийн өглөө 06:30 цагт тоглохоор болж байна.
Хэрэв тус тоглолтод хожвол шөвгийн дөрөвт Бразилын paiN Gaming болон FURIA багийн аль хожсонтой нь тоглоно. Манай улсын багийн хувьд энэ тэмцээний гуравдугаар шатны дөрөв дэх тоглолтдоо Европын "FaZe Clan"-тай учраа таарч, 0:2 онооны харьцаатай ялагдсан. Тэгвэл энэ тэмцээний Playoffs шатанд дахин учраа таарч буйгаараа онцлог.
Хоёр баг өмнө нь "IEM Melbourne 2025" тэмцээний хэсгийн шатанд таарч тоглоход The MongolZ баг 2:0 онооны харьцаатай ялалт байгуулж байлаа.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
